En turko ay un proverbo muy djusto. Todos los proverbos son djustos, no ay proverbo yerrado dizimos. Este proverbo dize: No tomes kaza, toma vizinos. Kuando merkamos o alkilamos una kaza, miramos si las kamaretas son anchas, si el banyo es konfortable, si la kozina es moderna, si tiene balkon i mas i mas otras komodidades. No demandamos ken mora aya. No savemos. Mozotros mizmo, ke moramos desde munchos anyos en mizmo apartamento, no konosemos los muevos moradores. Antes kuando mos ivamos a votar viyamos kolas de djente de la mizma kaleja. Todos konosidos, mos saludavamos, demandavamos hatir. Era komo se dize: Topadura de kosuegros. Estos anyos dalkavo tantas famiyas se salieron i tantas vinieron ke ni ke mos akodramos de eyos. Lo emportante es ke no savemos ken son. Oyimos tantos kavzos negros ke devemos de estar en alerto. Fuyidos de la prizyon son? Teroristos son? Unos patrones de kazas malorozamente no dan muncho emportansa, abasta ke les den la moneda alta ke demandan.
En mi chikes aviya un muy muy buen vizindado. Los vizinos eran mas emportante ke los paryentes. Por ke si afitava una koza ke kaliya ayudo, asta ke se dava haber a la famiya i teniyan ke vinir, ya estava la vizina al lado. Desparte ke no aviya estos telefones mobil, no aviya ni telefones en kada kaza. Kuando las mujeres se kansavan i keriyan asentarsen para tomar un reflo, se ivan ande la vizina. Em beviyan un kafiko, em de aziyan moabet. Avlavan d’aki d’aya, kitavan al rey, metiyan al vezir. Se davan ideas de gizado, se ayudavan a dublar los lavados a espulgar arroz o lentejas, a mundar zerzavat i mas i mas. Kuando en el apartamento aviya una okazyon komo espozoryo, kazamiento, paridura, bar mitzva, kada vizina metiya la mano para ayudar. Si se keriya tomar enformasyones sovre una ijika o mansevo para espozar, se demandava a las vizinas. Porke mas mijor de eyas dingunos no puediyan saver. Leshos de mozotros, si aviya un meldado en una kaza, todos los vizinos partisipavan a la orasyon. Este modo de vizindado kon ken se partajava las alegriyas i los dertes, pasava por psikoterapiya. No afitava pletos? I komo no? Ma no sureyava muy largo. Vizindado negro kita la vida por la nariz. Ay famiyas ke se transferan a otras kazas por modo de la vida preta ke les da el vizino. Mizmo un vizino negro ya abasta. Rogaremos ke no mos afite este modo de vizindado, ke renkontremos siempre djente buena en todo modo de lugar.
