A vezes mi mujer me dize: “Tu sos mi alma. Sin ti yo me kreyo ke so sin alma”. Yo empeso a riir i me meto a demandarme “Ke es la Alma?”
Puedemos dizir ke la Alma es lo ke da la vida a todo ke esta bivo. Unas kreyensas dizen ke la Alma viyaja del umano a la bestya i de aya a la planta o vise versa. No se si la Alma aze este modo de viyajes ama kreyo ke toda koza ke bive tyene una alma. Muestro meoyo aze ke puedamos pensar, dirijir muestras fonksyones de vida, de sintir, de amar, de sufrir, de adaptarmos, de ambezar, de djuzgar, de desidir. Toda esta aktividad del meoyo aze lo ke yamamos la Alma. Kitaremos la priz del meoyo, el puerpo muere i no keda nada de lo ke se yamava Alma.
La Alma aze ke kada umano seya diferente. Mizmo los buchukes ke se paresen komo un espejo, tyenen kada uno su propriya Alma ke lo aze distingir de su buchuk. Ay kreyensa ke dize ke la Alma nunka muere.Esto es verdad por la persona ke desha una ovra antes de murir. Kada vez ke mos akodramos de su ovra, mos akodramos de esta persona, es dizir de su alma.
Esto tanbyen amostra ke kreyer es una fonksyon de la Alma. En Ivrit tenemos tres palavras ke se paresen muncho. La una es Ruah. La otra es Nefesh. La tresera es Neshama. Dizimos “Nefesh Yehudi”, dizimos “le salyo la Neshama”, avlando kaji de la mizma koza. En Turko la palavra “respirasyon” tyene la mizma raiz ke “Nefesh”. Kuando oyimos una muzika ke mos plaze muncho, es la Alma ke frisona. Kuando meldamos una koza ke mos plaze muncho, es la Alma ke trembla. Bazandomos sovre Nefesh, puedemos dizir ke es la respirasyon ke mos aze bivir i kuando uno no respira, a la fin muere. En la Tora meldamos ke El Dyo ekspiro un reflo a Adam i Adam empeso a bivir. Esta palavra en Latin es “Anima”. De ayi salen las palavras “Animasyon” o “Animal” (Bestya). En Grego es Psihe. De ayi salyo la palavra Psikolojiya, la syensya de la Alma.
No se si ay munchas personas en el mundo ke beven raki, ama ay tanbyen personas ke kantan la kantika: "La alma do por el raki”.
