En el empesijo de esta semana teniyamos una seduta en el Gran Rabinato. Era la seduta del Konsilio de Egzekusion de la Komunidad Djudia de muestro payiz i avia una prezentasion sovre la populasion Djudia de Estanbol. Savemos ke serka de 1.000 djudios biven en İzmir. 60 en Bursa, a lo manko la mizma populasion en Bodrum i syertas famiyas en Ankara, Adana, Çanakkale, Kırklareli i Edirne… No konosemos las personas ke biven en los kazales de enverano. Biven en los kazales de la rejion Egea komo Urla, o de la rejion Mediteranea komo Kaş o Kalkan syertos Djudios; famiyas o individuales.
No es solo los kazales ke mansioni. Ma puedesh topar munchas almas ke biven en diferentes sivdades i kazales.
En los rejistros de muestra komunidad vemos el shifro de 14.200 personas sin kontar los mansevos ke biven en diferentes payizes; en las sivdades Evropeas. La Olanda es el paiz el mas emportante para la komunidad Djudia Turka. Vemos ke ay munchos mansevos Turkos ke biven en la Ingeltiera; en Londres i otras sivdades de este payiz. Es kon los pasaportes Espanyoles i Portugezos ke los mansevos toparon la posibilidad de enstalarsen en diferentes sivdades de los payizes Evropeos. La Espanya i el Portugal resivieron buen karar de mansevos Djudios.
Una partida emportante de los Djudios intelektuales ke no tyenen amor por la Turkiya pensan i avlan ke la populasion de los Djudios es manko ke 10.000 almas. Ma esto no es djusto.
Anyos i anyos estas personas avlan ke kada anyo ay 300-400 muertos en la Komunidad Djudia. El shifro del anyo 2023 es 215 personas. Vash a demandar kuantos bebes nasen kada anyo. Mi ijo ke nasyo en 2001 tenia 125 ijikos i ijikas de su aedad 23 anyos antes. Ya savemos ke munchos mansevos tuvieron kriaturas en otro payizes. Ma el anyo pasado serka de 85 kriaturas toparon la vida en muestra komunidad. Devemos de saver ke kada ija no es entejistrada en el rejistro del Gran Rabinato.
Ya puedesh demandar si los djudios si se estan kazando kon mujeres o ombres de una otra relijion. Es djusto. Si se estan kazando. Un tyerso de los Djudios se estan kazando kon mujeres o ombres de una otra relijion. Es enteresante ke los parientes keren ke sus ijos i ijas sean Djudos. I vemos ke en los klobes de Bar Mitzva i Bat Mitzva se topan munchas kriaturas ke son nasidos de famiyas mikstas.
La Komunidad Djudia preparando esta istatistika no tomo en konsiderasion los Djudios Turkos ke biven en otros payizes.
Espero ke kuando la situasion politika va ser mas stable en Turkiya munchos mansevos van a preferar de bivir en Turkiya.
