A la vejes, me hui de muevo a la Universita después de tener inyetos, sanos ke estén. Ensima de todo, la Universita ande me hui se yama Universita de Nishantash. No kreyer ke la Universita de Nishantash esta en Nishantash. Le metyeron este nombre ama esta detrás del “kuviko” del banyo, ande se arapa el guerko, en 1453. Avlando de 1453, saver ke esto es el nombre de una maale en Estambol i no la data de la konkista de Konstantinopla.
El Profesor ke teniyamos en esta Universita mos meldo un pasaje de Sait FAİK, el famozo eskrivano ke bivyo en la izla de Burgaz. Aki vamos a savorear una parte de este teksto.
“En uno de los tornos ke dava en las kayezikas trankilas i estrechas de Burgaz ke me plazen tanto, meti la mano a la aldikera i kiti mi navajika ke la tengo para kortar palikos mientras ke kamino para no enfasyarme i arapi el kalem miyo para tener una punta mas fina. Kuando yegi a mi fin, di un beziko al kalem i me meti a eskrivir kon grande ardor. Me estava sintiendo medio loko de la emosyon.”
Después de oyir este teksto, me akodri de la ovra inkreivle de Gogol "El jurnal de las memoryas de un Loko’’. Después de aver visto la performansa de “Genco Erkal” en su teatro, en verdad ke kaji no pude durmir toda la noche pensando a la shizofreniya. A ke parese la lokura? Si el umano puediya djugar el rolo de un loko? Klaro ke konsiderado loko, no es del todo agradable estar aryento de una kamiza de loko o estar debasho de una dush de agua de alta presyón Además, dan kuras ke aze al pasyente totalmente pasivo, i ke le kitan la savor de la vida. Ama kontra esto, puedemos imajinar una koza ke mos puede plazer. Komo la libertad kompleta de dizir o de eskrivir todo lo ke keres, komo se dize en Turko: delidir, ne derse yeridir." Es loko i dize lo ke le viene al tino’’.
Ensi ninguno me puede djuzgar. Ken disho ke no ay libertad de pensar. Diga en boz alta, todo los pensamyentos ke no pasaron por la sensura. Vazya todo le ke tyenes en tu korason. Por seguro ke no te van a tomar en konsiderasyon. Ama yene puede okurrir ke algunos van a avrir los ojos kon grande birra, van a intentar de darte una buena lesyon. Ama tu, seas lo ke sos, no trokes de kamino.
Van a dizir, “ke esta avlando este loko”. O “deshalo este povereto de loko”. O “no metas tino a lo ke esta dizyendo este loko”. No se save, puede ser algunos se van a sentir un poko mal en su konsiensya. No digo ke se van azer pishman, ama es posible ke no van a durmir muy trankilamente algunas noches. Esto fue lo ke sonyi si algún diya djugava el rolo de loko.
Todo esto lo ke eskrivi parese un poko a la “Alavasyon a la Lokura" de Erasmus. Un livro ke Erasmo el Holandez, eskrivyo en un a semana kuando estava envitado en la kaza de Thomas Moore, el muy famozo eskrivano Inglez ke eskrivyo “La Utopya”.
Días de esperanzas de mijorar, avansar kon muncha salud, kudyar a los nesesitados siempre kon amor, rizas alegres i kon lokuras konstruktivas.
