Kuando era chika, avlavamos entre amigos i diziyan ke en la Amerika ay radios kon una vitrina ande amostran filmos. Mozotros no los kreyiyamos, diziyamos, ayde djanum, estas echando de la kavesa. Ken puediya dizir akel tiempo ke se va realizar lo ke kontavan.
Me akodro del diya ke vide una televizyon por primera vez. Enfrente teniyamos un vizino ke morava solo. Un diya se merko televizyon. Vinieron djente para meter anten al tejado. El uno en el tejado el otro en la kaza i el otro gritando por la ventana, para dizir al del tejado: “un poko mas a la siedra, no no, no ay buena vista vate atras.” i mil i una rekomendasyon. Kurto, ya se enstalo la anten. Estas antenes eran unos palos largos, kon ensima un elezon de aluminyum. El kablo ke unava la anten kon la televizyon, pasava por delantre del apartamento entero, asigun el kat ke moravan. Akel diya me akodri komo teniyamos mozotros antenas de la radio en lo ke moravamos en Galata. Eran teles de kovre i se echava de un tejado al otro, mas largo i mas alto el tel, mas mijor se oyiya los postos evropeos.
Ya se enstalo la televizyon, ma no aviya ampesado dainda a lavorar porke akel tiempo solo las noches despues de las 6 ampesavan los programes. Akel diya asperimos kon grande emosyon ke venga la ora. Ya vino la ora, ya se asendyo la televizyon ma no estavamos puedyendo ver lo ke estava djugando, porke la televizyon estava de lado. El vizino ya mos vido ke estamos mirando kon grande admirasyon, abolto la direksyon de la televizyon i ansina estavamos vyendola. Siguro ke boz no aviya. Las televizyones ke aviyan salido muevamente eran pezgadas, anchas i profundas. No komo las de agora ke tienen dos dedos de anchor.
Mi papa, vido ke mos esta kayendo las bavas en mirando, izo una surpreza i en supito un diya sono la puerta en lo ke la avrimos ke no veyamos una televizyon? Una alegriya no demandesh. I ande mozotros uvo la mizma prosedura kon la anten. Se enstalo la televizyon, mozotros alegriya grande la asendimos. En el ekran aviya solo una foto kon numeros. Ke seya, avyerta ke este. Ya vino la ora ke ampeso, en primero mos amostravan askeres kon la bandyera turka kon el imno turko. Ampesava kon las novedades. Siguro ke la televizyon era preto i blanko. Para mozotros era maraviya. En vezes se kortava la emisyon, metiyan una foto de un djarro antiguo. Estos programes sureyavan asta la medya noche. I despues ke eskapava, eskriviyan “No vos olvidesh de serrar vuestra televizyon”. Mozotros mos kedavamos a mirar i esto asta la fin.
Despues salyo televizyon de kolor. Ayde estas televizyones al sierkol. De un kanal se izieron dos. I kon tiempo munchiguaron.
Vos konti esta chika memorya para amostrar komo troko la teknolojiya. Las televizyones ke adoravamos en dos tres anyos se echaron al sierkol porke ni los eskidjis no los keriyan tomar. El egzemplo de la televizyon es un egzemplo del empesijo de la evolusyon de la teknolojiya.
