Komo de uzo, un personaje o un evento relatado al mez koryente…
Aunke no fue la primera enkizisyon, la enkizisyon espanyola fue unika desde su empesijo, el 1 de Noviembre de 1478, porke estava kontrolada por un monarko i no por la Iglesia. Si bien ke la organizasyon de la Ofisina de la Enkizisyon, komo todas las burokrasiyas, avansava avagar avagar, i les tomo kaji dos anyos enteras para nominar a los dos primeros enkisitores, ma en todo kavzo no perdyeron tyempo para krear un reinado de teror.
Raramente oyemos istorias de konversos (Djudios ke se konvirtieron al Kristianizmo solo por la forma) ke se revoltan o toman mezuras kontra la Enkizisyon. Ma, es de saver ke, las viktimas del primer auto de fe (kemar enriva de una lumbre de lenyos estando atado a un pilar, sin diferensiya de sekso ni de edad, el metodo de egzekusyon preferado de la Enkizisyon) fueron en realidad djuzgados por la pretansiyon, akuzasyon de aparejos de revolto kontra la Enkizisyon.
Kuando la Enkizisyon entro a Sevilya en Septembre de 1480, Diego de Suson penso imedyamente ke aviya ke tomar mezuras prevantivas. De Suson, un riko bankiyero, arekojo syertos otros konversos poderozos i empeso a elaborar un plan de aksiyon ke inkluiya arekojer i organizar milisyas para su propyo defensa. Munchos de los konversos de Sevilya se topavan entre los sivdadinos estimados de la sivdad: bankieros, ministros i inkluzo ombres relijyozos de la Eglizya ke se espantavan de las reperkusyones de sus erensya Djudia. Los planes, malorozamente, salyeron en medyo kuando la ija de De Suson, Susana (ke era famoza por su ermozura), revelo los planes a su novyo sekreto, ke no era un konverso i este novyo informo a las otoridades sovre los planes de De Suson.
El 6 de Febrero de 1481, sesh de los lideres de la banda fueron kemados sovre los lenyos. De Suson fue egzekutado tres dias despues. Una lejenda dize ke Susana, ke aviya revelado el sekreto, entro por un kurto tyempo en un monasteryo para eskonderse del mundo, ma eskapo sus dias en la kaye peryendo el meoyo de la verguensa por lo ke aviyan provokado sus avlastinas i aksyones.
Es ke es de saver ke el buto inisyal de la Enkizisyon no era persekutar los Dudios. Era para purifikar a las masas Kristianas i eliminar, azer despareser uzos o kreensyas relatados al Djudaizmo de los konversos ke se aviyan baptizados i munchos de estos lo izyeron solo para salvar sus vidas. Despues de la ekspulsyon de 1492, se supozava ke los ke kedaron en Espanya eran katolikos puros.
