Es diya de Shabat ke me fui dospues de la orasion de Shabat al “Diya de Sinyatura del muevo livro de Dalia Maya”. Esta aktivitad fue realizada en un atolye de arte i de konferensias ke se topa en Nişantaş. No se si va alkansar a traduizir el nombre del livro: “Ayrık Otunun İçsel Yolculuğu - El Viyaje Interior de la Yerva Separada”. Aviya una grande djentoria en el lugar. Me asenti un poko i Dalia me sinyo el livro ke merki. Ay mas muncho de trenta anyos ke konosi a Dalia en el Şalom. I ay mas de 30 anyos ke lavoramos endjuntos en diferentes kampos. Eya es miembro del konsilio del Muzeo Djudio del kual so prezidente. Espero para Dalia ke este livro va ser el primer de sus livros.
Diya de djugeves mi amigo, Moris Levi me bushko i me disho ke los Balatlis este Shabat van a estar en Ortaköy por la orasion de Shabat. I topi la posibilidad de ir a la orasion. Ay mezes ke no veygo una sinagoga kon tanta djente. Los Ortaköylüs, los Balatlis mizmo una partida de los yahides de Sirkeci; todos estavan aya. Ay semanas ke los yahides del kal de los Frankos estan aya en el midrash de Ortaköy. Esta semana i los yahides de Kuzguncuk estavan kon eyos para selebrar el meldado del eks-prezidente Nesim Albala de Kuzguncuk. I los prezidentes de la Komunidad Djudia, Kohen i Ibrahimzadeh estavan aya en la Sinagoga de Ortaköy. Reelmente fue un diya muy presiozo para muestra komunidad. Komo una fiesta.
Kero felisitar a Albert Elvashvili, presidente de Ortaköy ke esta achetando todo modo de grupos a la Sinagoga de Ortaköy.
Dospues de esto todo, devemos de pensar si reelmente devemos de tener avyertas 15 o 16 sinagogas o devemos de azer komo los Edirnelis ke dospues del fuego ke afito en el empesijo del 20en siglo, al lugar de las 17 sinagogas ke fueron kemadas dyeron karar de fraguar una sola sinagoga por diferentes razones.
Es djusto ke tener 17 sinagogas es una rikeza. Ma puedeser es una mas grande rikeza de tener sesh o syete sinagogas yena de djente … Bivir i ver
