El amor deve de ser komo respirar. Ande seya ke seya, kon ken ke seya, u byen si estas mizmo solo, el amor deborda de ti.
· El amor es todo lo ke sos.
· El amor esta en el korason de la persona, esta en sus ojos, en su komportamyento, esta en el tono de su boz.
Depende de la emportansa i la valor ke te da, esta en los sakrifisyos ke izo por ti. Oye kon tu korason, Ve kon tus ojos.
Ser namorados es el arte de entenderse i apoyarse uno kon el otro. Kuando estas endjuntos, la vida es mas ermoza, las diffukultades son mas fasiles.
Las dos personas, para estar orozos azen esforsos.
La persona deve de bivir en savyendo su valor.
Deve de saver la valor del syelo, de las sezones, de la agua, del aver, de la abondansa ke sale de la tyerra, de las yervas, de las rozas.
· La persona deve de amar todo.
· Deve de ver la armoniya ke ay en el universo.
· Deve de bivir savyendo su valor.
· Las kantikas ke azen sonreir, u byen ke azen yorar,
· Saver, rekonoser, remersyar a todo.
· Ensembrar amor en los korasones, sonriyendo komo las kriyaturas, azyendo sonreir a los otros.
· Engrandeser kon el amor endjuntos, es el regalo el mas grande de la vida.
· El amor es la buendad, la amista, es la mano umana ke se da al den frente.
· Dingun regalo no tyene la valor komo el amor ke das de aryento de tu korason.
· El tyempo es muestra vida i es el regalo el mas valutozo.
· La Kerensya es el kamino prensipal para la felisidad de la persona. La kerensya de la persona, abriga la tolerensya i el entendimyento.
La kerensya es una komunikasyon kayente ke pasa de un bivo al otro bivo.
Me akodri de una dicha de “Rochefoucauld”.
“En kada edad la persona es komo una kriyatura. Su kavesa syempre bushka un kavesal de kerensya”.
La kerensya verdadera parese a la luz ke se propaja. Es komo el sol ke aklara lo bueno de lo negro, lo djusto del indjusto.
La kerensya es una valor ke no va trokar nunka en el mundo.
Los problemes ke no se pueden resolvar, kuando ay la kerensya se topa solusyones kon fasilita.
· Mi marido “Meir”, z"l ke es un poeto i tyene poesias muy sentimentales diziya ke:
· “La poesia es un arte. El arte es la ermozura. La ermozura es el amor de la persona”.
Keridos Lektores, espero ke la kerensya va tomar el lugar de todas las gerras, de todo modo de enemistedad en el mundo entero.
No peryeremos muestra konfiensya en el Todo Poderozo para pueder bivir kon kalmo i kon felisita.
