El 14 febrero, dia de San Valentin, es una selebrasion de amor i de amistad. Es una manera de ekspresar la afeksiyon i el karinyo entre keridos. Amar i konsiderar las personas kon ken estamos en relasion i ekspresar muestros sentimientos, es un akto nesesario i benefisial para la umanidad.
Todos konosen la istoria del enjenior de politeknik fransez Dreyfus, ke okurro en el anyo 1894. Yo vos va kontar komo el pudo rezistir a estar en vida i a la fin resivir su posto i su onor atras. Despues de su akuzasion, el fue embiyado a la isla del Diablo, en la Guyana franseza para ke no pueda salir bivo. La famiya de su mujer kijo ke se divorse de este ombre ke los dezonoro. Lucie, su mujer, ke kreia sien por sien en su marido, no aksepto la presion de sus parientes i izo un pakto kon Alfred. El devia de rezistir kontra todas las akuzasiones i el mas importante devia de estar en vida para mostrar su inosensia a la Fransia, i a sus ijos. Durante sinko anyos los espozos se embiyaron sienes de letras ke fueron aviertas, analizadas i sensuradas por la administrasion franseza. Esta korespondensia de munchos anyos, fue una arma de survivensia para Alfred.
De su parte, su ermano Mathieu Dreyfus ke era un industrial i eskritor, estava konvensido ke Alfred era un ombre de onor, ke keria bien su patria, la Fransia, i ke fue detenido una demanyana sin azer alguna koza mala. Mathieu empeso una kampanya en favor de su ermano para demonstrar su inosensia. Fue menasado, ma poko a poko Dreyfus empeso a ser el simbolo de la nasion. Los intelektuales, los sientifikos i artistas estavan en el lado dreyfuzista i entendieron ke el futuro de la Republika estava unido al futuro de Dreyfus para formar una demokrasia reel. Este proseso empeso a ser un grande skandalo politiko en la Fransia i en el mundo, i a la fin, los dreyfuzistos ganaron. Kuando la justisia merese su nombre, gana el puevlo, gana el paiz, gana la demokrasia i el umano se kalma i bive kon amor de todo i de todos.
