El Grammy no puediya ser un evento mas apropiado para komemorar el barbaro i orivle asesinato de sienes de personas i fuir mas de 40 personas en el Nova Muzika Festival en Israel el 7 de oktobre.
El direktor egzekutivo, Harvey Mason, utilizo la grande platforma para rekonoser la atrosidad istorika en el Festival Supernova i disho estos biervos: "Kada uno de mozotros, no emporta de ande vinimos, estamos unidos por la eksperiensia kompartida de la muzika. La muzika mos auna komo mas nada lo puede azerlo, i por esto la muzika deve de ser siempre muestro espasio seguro. Kuando esto se viola, afekta la esensia de ken somos."
Aviyamos sintido esto en la sala de konsiertos Bataclan de Paris, en el Manchester Arena de Inglaterra, en el Festival de Muzika Route 91 Harvest en Las Vegas, i en el 7 de oktobre. Sintimos esto, kuando oyimos la trajika novedad del Supernova Music Festival for Love, ande mas de 360 fanatikos de la muzika peryeron la vida i otros 40 fueron fuyidos. Akel diya i los diyas trajikos ke sigieron fueron terivles para el mundo, estuvimos en dolyo por la piedridad de todas las vidas inosentes.
Oy bivimos en un mundo divizado por tantas kozas, i la muzika no puede rezolver todo, ma estamos todos de akordo ke la muzika deve kontinuar a ser el tereno komun ande todos mos enkontramos endjuntos en paz i armonia. Kada kantika ke oyimos esta noche, no emporta de ande es, mos auno kon otras personas ke se emosyonaron de la mizma manera.
Tomaremos komo egzemplo este kuarteto de kuedra: komo individual estan kitando muy ermoza boz, ma endjuntos estan reushendo a azer una koza muy ermoza ke nunka puediyan azerlo solos.
Estos muzikos de rasa israeli, palestina i araba estan aki, djugando endjuntos. Por un lado, en un mundo ande el antisemitizmo, el sentimiento antiisraeli, i las konsiderasiones politikas estan pujando, devemos sintir gratitud a Mason por utilizar la seremonia de premios para avlar del dia mas oskuro del puevlo judio desde el Olokosto.
