Un tiempo, kaje kada famiya teniya una mosika. Estas mosikas viniyan de los kazales de Anadol. Los kazalinos mandavan a sus ijos a la eskola ma no mandavan a las ijikas. Diziyan: Para kualo ke melden las ijikas, despues se les avren los ojos. Porke kuando toman edukasyon no les agradara maridos. A estas ijikas las mandavan a Estanbol, al menos ke ganen paras i ke las manden a sus paryentes. Me akodro ke tanbien aviya ijikas judiyas de famiyas non rikas de Trakya, ke viniyan a lavorar ande las famiyas rikas. I para eyas era un grande orgolyo. Porke en estas famiyas em lavoravan em tomavan una buena edukasyon; se ambezavan el franses, se ambezavan a kuzir i brodar, a alevantar i asentar. Ansina mizmo en kazandosen, estas famiyas le davan una buena dota i ashugar komple.
Kon tiempos trokaron las leyes. Salyo leyes de sigurita. Kada persona deviya de tener una sigurita. Kaliya ke pagara kada mez un montante minimal para ke despues de una edad se azera retirada i tomara una mezada. Ansina fue ke mas dinguna manseva no kijo lavorar en las kazas. Todas se empyegaron en las fabrikas o en los lugares de komersos para tomar mezadas i tanbien para ke seyan enrejistradas en la segurita sosyal. De sorte ke estava muy difisil de topar ayudantes. En supito salyeron las mujeres Rusas en medio. Estas mujeres desharon sus famiyas en sus kazales i vinieron a lavorar aki i mandavan las paras a sus famiyas. En el empesijo estava bueno, i para eyas i para mozotros. Lavoravan kon dolares. Despues ke ampeso a dezmodrarse el dolar, i esta oportunidad ampeso a apezgarse. Agora mas no keren lavorar kon mezada; lavoran por diya i esto esta kostando de verdad muncho. Kon este ritmo va ser komo en la Evropa o en la Amerika, ke las mujeres lavoran kon ora i se azen pagar por ora.
