El 22 febrero, dia de djueves komemorimos a muestro kerido amigo, SELİM HUBEŞ, z"l, en el oditoryum de la eskola djudiya. Veramente un diya muy sentimental, yeno de rekuerdos, kualos mos izieron riyir kualos mos izieron yorar.
Su kerido amigo de 45 anyos, İZZET BANA, tomo la palavra kon una maraviyoza prezentasyon. Kon slaytes, kon muzika, kon sus kantikas, kon sus ermozas palavras, mos konto la vida de este presyozo ombre. Él periodista, él kompozitor de kantikas, eskritor i aktor en teatros i lo mas emportante bastante intelijente i filozof.
Izzet dyo la palavra a su ermano YAVUZ, a sus vyejos amigos, seya del grupo “Los Pasharos sSefaradis”, seya de los teatros i por siguro a su kerida mujer, renomada por ser la primera artista djudiya del teatro turko, ROZET HUBEŞ.
Rozet i Selim Hubeş tyenen un lugar en mi vida muy diferente.
“Atras 20 anyos una demanyana tomi un telefon de muestro kerido amigo, en ganeden ke este Selim Hubeş dizyendo ke el djugo “ Kula 930” se va meter en shena por la tresera vez. En primero se djugo en el anyo 1977 i repetado en 1987.
--- Forti mozos los djugadores vyejos del Dostluk yurdu derneği desidimos de djugar de muevo la "Kula 930” i te eskrivi un rolo para ti; ke dizes?”
Yo ke lo tengo visto puedeser mas de10 vezes komo espektadora en el lokal del Dostluk en Osmanbey, agora va ser djugadera en este djugo? Sin demandarle kualo va ser mi rolo, de vista le dishe:
--- Si, deke no.
En verdad me dyo un karakter muy ermozo, ke me plazyo muncho. Un rolo de una profesora de fransez ke era mezmo mi profesora (Mlle. BEHAR)
Rozet Hubeş fue mi primera direktora en mi primer djugo en el Dostluk, eya, me ambezo munchas kozas presyozas sovre la shena i el teatro.
Rozet kon su boz dulse tomo la palavra:
En memoria de Selim
Ekspozisyon de los enstrumentos muzikales de Selim Hubeş:
Antes munchos anyos me esperti de un esfuenyo i se lo konti a Selim.
--- Selim! Vide un esfuenyo muy malo, todos los livros, los CDs, i los instrumentos musikales ke tyenes, me gritaron i me echaron de kaza afuera. Me disheron, vate de aki, para ti no ay lugar.
Kon anyos el koshmar ke vide se izo verdad, la koleksyon de Selim tanto estava pujando, para mozos no kedo lugar, fuimos ovligados de desharlos en akea kaza i mozos mos pasimos a otra kaza!
Agora si me permetesh, sin tomarvos muncho tyempo, en memorya del dia de oy, kero partajar mis sentimyentos.
Si, antes 44 anyos en la ovra DOSTLUK YURDU DERNEĞİ iva djugar un djugo nombrado KULA 930. Los eskritores eran, YUDA SİLİKİ, İZZET BANA, JOJO ESKENAZİ i SELİM HUBEŞ.
Akel tyempo, yo partisipava en los teatros del klub Amikal i estava djugando en un teatro de esta ovra de mansevos. Selim vino a ver este teatro, i mando a dizir:
--- Aya ay una ijika nombrada Rozet. Yamalda ke venga i djuge en la Kula 930.
Ansi entri a este djugo en rolo de mujer de Selim (1977-1980) Este rolo mos yevo a un kazamyento de 41 anyos en la vida reel.
Selim era muy entelijente, muy entelektuel i amante del arte. Kon sus avlas de meoyo, kon su umor ke aziya riyir a todos i kon sus ideas, deshava kuryozos i aziya pensar. El era una persona ke ayudava en sekreto, sin darse a konoser. Oy en diya me kontan sus ovras. Ande lavorava, a munchos los izo patrones de sus kazas i esto me da muncho plazer.
Dospues de su muerte, pensi de avrir un muzeo i mostrar los instrumentos. Partaji mi idea kon mis amigos, me disheron, “estos valutozos instrumentos para ke esten detras de un vidro ke se empleyen i ke den sus bozes”.
De vista troki de idea, los instrumentos son para tanyer, ke karar de sonido daran seya mas mijor a rekordar.
Pensi ke el mijor lugar de guadrarlos es la eskola muestra.
Keridos elevos i profesores de muzika, kreygo ke vozos en tanyendo estos instrumentos les vash a dar vida. Ke bueno ke izitesh una ekspozisyon i ke bueno ke en dando sus sonidos va ser una buena memorya. Mas no se ké dizir, remersyo a la admistrasyon eskolar, a los direktores ke orginazaron este evento maraviyozo, remersyo a İZZET BANA ke peno para preparar este diya i remersyo a todos los amigos de SELİM ke estan aki i ke lo amavan.
Me datesh una memorya inolvidavle de muevo remersyo a todos.
ROZET HUBEŞ.
