Una eskrita ke salyo en el “Le Petit Journal” (en fransez)
Edisyon de Estambol, yeno de alavasyones.
Lo kije partajar kon vozotros keridos lektores, en traduizandolo al ladino.
El famozo eskritor turko, Mario Levi mos desho la buena vida en el 31.01.2024. Muy konosido i amado de los
Estambullis, eskrivano sempatiko, lo yamavan el
“Proust turko”, por su ovra ke era markada sovre la bushkida del pasado.
Sus personajes nostaljikos, su guste por las frazas muy largas (una fraza un paragrafo u una oja!) son sus karakteristikas literarias.
La vida de Mario Levi:
El nasyo en 1957 en Estambol, es el autor de 15 livros i ganador de munchos premyos literaryos turkos.
El vino de una famiya Sefaradi, ke vinyeron de la Espanya en el kinzen siglo. Se engrandesyo en un entorno multilingue, ande se avlava, el ladino, el turko i el fransez.
Estudyo en el lise fransez, Saint Michel, se izo konoser en los jurnales para pueder eskrivir sus artikolos.
En el anyo 1986, su primer livro fue Jacques Brel,
El Ombre Solo. Despues eskrivyo romansos ke pasavan en Estambol i tuvo una vida muy aktiva.
El fue profesor de fransez, jurnalisto, lokutor de radyo, kreador de anonsyos i Prof. en la Universita de Yeditepe.
Komo estava eskrivyendo? Se echava presto las noches i se alevantava a las tres de la medya noche para pueder eskrivir kon el stiló, i despues lo revizava en el komputer.
“El Romanso de Estambol” es un esfuenyo.
Testimonyo sovre el Mundo Sefaradi. El uniko en sus livros ke fue traduizado al fransez. Este romanso de 700 ojas, deskrive la vida de los miembros de una famiya djudiya mas de tres jenerasyones en el 20en siglo entre los anyos 1920-1980, algunos tambyen ke vinyeron de la Aleksandria, de la Vienna i de Odessa.
En el livro ay 47 personajes ke fueron prezentados en una atmosfera nostaljika, ande la savor, las golores, los objetos familyales, i las fotos vyejas tyenen un grande lugar.
El narrador es el testigo, ma de vez en kuando el aktor de unas kuantas anekdotes ke le kontaron al eskrivano, i ke el eskritor los arekojo durante syete anyos.
Por Mario Levi, es la literatura ke prezerva mijor las verdades de la istorya. El romanso mos konta lo ke no dizimos, ver lo ke es guadrado. Teniya la responsabilita de eskrivir sovre la sivdad de Estambol kon sus onduras, porke era amorozo de esta sivdad.
En munchos reportajes kon los jurnalistos, Mario Levi disho, ke el es el primer eskrivano turko ke tuvo el koraje de dizir ke apartyene a la kultura djudiya. Konsiderava su apartenensya a una minorita, porke era eksperimantado, aviya konosido el egzilio komo la baza de su eskritura. Deke?
Porke esta situasyon, da un sentimyento de piedrita, porke las minoridades biven syempre kon el espanto de deshar todo aki.
Estambol era la sivdad de su korason.
El kaminó i vijitó munchos paizes. En una entrevista en el anyo 2011, Mario disho ke su mas grande dezeo es de pasar toda su vida en Estambol. Unos kuantos lugares ke keriya pasar su tyempo eran: Taksim, ande paso su istorya, la avenida İstiklal en Beyoğlu ande su enerjiya se terminava, porke la mesklatura de kulturas, se manifesta en la prezensya de las eglisyas, sinagogas i meshkitas.
Kadiköy kon su famozo merkado, Haydarpaşa kon la istasyon de treno, unos unikos lugares en el mundo ke estan en frente de la mar i de ande se puede kontemplar el maraviyozo panorama de la istorika peninsula de Estambol.
El pensava komo un oksidental, ma kon sentimyentos oryentales. Kuando le demandavan de ke paiz se sintiya, el respondiya: “Es la lingua turka ke es mi paiz”.
Una persona yeno de kultura ke se enteresava en todo.
Mario Levi aviya dicho ke keriya dar su dalkavo reflo en Estambol. Esto ya se realizo ma, el va kontinuar a bivir en muestros korasones en otra manera, kon sus livros, kon sus eskritas yenas de mesajes.
Repozo bueno ke tengas kerido Mario, i tu kamino ke seya arelumbrado kon munchas luzes.
