Noche de Shabat en komyendo en la meza, izimos nostaljiya kon mi kerida mujer. Antes kuando eramos chikos, ké komiyamos noche de Shabat en la meza? En primero viniya el pishkado. Invyerno era o la Palamida o el Lufer. En vezes Levrek, Sudak o si no Mezgit. Se koziya kon guevo i limon ke se yamava "a la shaka" o kon domat i pirishil. Si no aviya pishkado aziyan meoyo. Kon la mizma sos ke vos konti. Kuando viniya enverano era el pishkado Gaya i se aziya kon la sos de avramila. Antes ke venga la komida de la noche en vezes aziyan komidas agras, komo apyo, aryento kon karota i patatas. Enverano, Bamyas o Endjinaras. Enverano porke se topava muncha tomat, por empesar aziyan Armi de tomat. Aviya komidas ke en noche de Shabat en la kaza muestra no se gizava. Komo Avas, Garvansos, lentejas, makarones, tambiyen kol, prasa, karnabit. Estas komidas se aziyan entre la semana. Las komidas majores era Avas kon ispinakas, kon tas kebap, bizelya, fasulya Ayshe o chali, al lado gayna, yaprakes de ispinaka o pazi aryento kon sarsicha. Tomates yenas kon pipirushkas. Albondigas de prasa en vezs las aziya papeyadas kon el kaldo de la gayna. Enverano mos plaziya komer Turlu. Inviyerno antes no aviya kozas de enverano. En invierno tomavan konserva TAMEK turlu, bizelya o fasulya Ayshe ets. Rosto kon pure, o si no karne kon patatas en el orno. Enverano kuando saliya la berendjena era muy kolay para las mujeres. Porke kon berendjena se aze munchas komidas. La berendjena asada, (Hunkar begendi) bohchas, ke se yama (Islim kebap), Karniyarik, ets. Estas komidas ke vos konti sin arroz no eskapava. Kuando viniya enverano mos plaziya komer el arroz kon tomat. Mas de esto en vezes para empesar aziyan mundarilik, armi de pacha, o armi de gayna. No me esto akodrando la agristada si se aziya en noche de Shabat. Aryento de una ora en komyendo, mos vino al tino estas komidas. Si pensamas otrun poko ya puedemos topar mas komidas ke se aziya antes 50 anyos en mi chikez.
arroz kon tomat
kucharikas de berendjena
