Es ke Israel va ser diskalifiada despues ke dos kantikas fueron refuzadas? La diskusion entre el Eurovision i Israel esta kontinuando despues ke dos kantikas, 'October Rain' i 'Dance Forever' fueron refuzadas por sus sinyifikasion "politika". Asta el 11 de marzo, Israel va pueder prezentar una kantika ke uydeya a las reglas de Eurovision. Es ke Israel va pueder partisipar al 68en Festival de Eurovision?
Los diyas ke pasimos, la Union Evropea de Radiodifuzion (UER), (el organizmo ke organiza el famozo konkurso), refuzo la kandidata israeliena, la kantadera rusa-israeliena Eden Golan, de 20 anyos, por modo de la sinyifikasyon politika de su kantika. La kantika, 'October Rain', esta aziendo referensia a las viktimas del atako de Hamas del 7 de oktobre en el sur de Israel, kon biervos komo: "No kedo aire para respirar / No ay lugar para mi", "Todos eran buenos ijikos, kada uno de eyos”. La kantika tambien esta aziendo referensia a las "rozas", ke se utiliza komo kod militar para las muertes en la gerra. "Baylando en la tormenta /, No tenemos nada de guadrar", "Yevame a kaza /, I desha el mundo atras /, I te esto prometiendo ke esto nunka va afitar de muevo, / Dainda esto mojada de la luvia de oktobre".
El ministro de Kultura israeliano, Miki Zohar, se ofendio al komentario ke los biervos estan politiko. La kantika esta "sentimental" i "esta ekspresando el sentimiento del puevlo i del paiz en estos dias, i no es politika", eskrivio en las redes sosiales. "La Union Europea de Radiodifuzion kale ke se komporte de forma profesional i neutral i ke no permeta ke la politika afekte el arte", disho Zohar.
Segun la enformasion del sitio web de novelas israelianas YNET, la UER tambien refuzo la segunda kantika prezentada, 'Dance Forever'. El Ministerio de Asuntos Eksteriores enformo ke la segunda kantika tambien fue refuzada. Los biervos de la kantika 'Dance Forever' son en ingles aparte de unas frazes en ebreo. YNET publiko los biervos de la kantika, ma no eksplikaron los motivos detras de la diskalifikasion. Una posivle razon puede ser ke 'Dance Forever' esta referando al atako de Hamas al festival Nova Music el 7 de oktobre ande 364 personas murieron.
La Korporasion Israeliana de Radiodifuzion Publika (KAN) aviya eksplikado ke no teniya "dinguna entision de remplasar" la kantika 'October Rain'. "Si no es aprobado por la UER, Israel no va pueder partisipar al konkurso", disheron.
En una konferensia organizada en Yerushalayim, el prezidente israeliano, Isaac Herzog disho ke kale estableser un dialogo entelijente entre la UER i el KAN para permeter ke su paiz partisipe al Eurovision. "Kreo ke es emportante ke Israel partisipe al Eurovision, i esto tambien es una deklarasion porke ay enemigos ke tienen entision de ekspulzarnos de kada senario", disho Herzog.
La UER aviya refuzado los komentarios de prohibir kompletamente Israel de partisipar a la Eurovision por modo de la gerra en Gazza. Las opiniones estan divizadas. 400 kreativos de la endustria afirmaron una karta en apoyo de la enkluzion de Israel al Eurovision. Israel tiene tiempo asta el 11 de marzo para prezentar una kantika ke va uydear a las reglas de Eurovision. El final de Eurovision 2024 se va selebrar en Malmö, Suesia, tras la viktoria de la kantadera Loreen del anyo pasado.
