Dia de Alhad kuande sale el aver ermozo, el korason me se aze komo las alas del pashariko i kero salir a las kayes para kaminar. I seguro ke salgo. Tengo programes en la kavesa. Por egzempyo, Tur de Sultanahmet o tur de Balat. O sino tur de Pera kon Galata. Komo esto tengo en la kavesa siertos tures. Kuando eskapa el invyerno antes ke empese el enverano, me gusta irme a las Adas. Prinkipo o Halki no me difera, o sino a Burgaz. Vos kontare komo ago el tur; si vos plaze i vozotros lo azesh. Dizeremos desidi de azer el tur de Sultanahmet. En primero me vo a Sirkeci, dizeremos a las oras 10.00. Me vo kon metro a Sirkeci. Empeso a kaminar el muzeo ke ay aryento de la Gar de Sirkeci. Es muy chiko ma es muy sempatiko, un muzeo de trenos. De aya kaminando suvimos el yokush de Cağaloğlu. En el kamino mos sale la meshkita ke se yama Nallı Mescidi. Es kaji al lado del Edifisio del governador. Es una meshkita de ver. Tambiyen la kaza del governador es muy ermoza. De aki enfrente del Konsolato de Iran kamino la kaye ke se yama Ebusuud. En esta kaye ay botikas turistikas muy ermozas. De tapetes, de djoyas, vistimyentas i munchas otras kozas. De aki vinimos a la plasa de Sultanahmet. Aki es una plasa maraviyoza. De una parte ay la sisterna Yerebatan, en frente la meshkita de Ayasofya kon la meshkita ke se yama Sultanahmet. De aki en kaminando puedesh kaminar para el Hipodrom. Esto todo ke vos konti para vijitar vos pasa las oras komo agua. Ya viene el tiempo de komer. Puedesh komer unas kozas ke vos trava la alma, porke aki puedesh topar todo modo de koza para komer. Despues de komer kaminando puedesh abashar el yokushiko ke se va al parko de Gülhane. Aryento de este parko ay el muzeo arkeolojiko, ke es un muzeo de ver. En salyendo del muzeo puedesh asentarvos en el parko de Gülhane, bever un kafiko para eskansar. I de aya kaminando vinish yene al gar de Sirkeci para tornar a kaza kon Metro. Ansi vos pasa el diya yeno yeno i kon bastante kultura. Si vos plazyo este paseo, vos puedo eskrivir otros lugares.
