La semana pasada, diya de mierkoles topimos la posibilidad de ir a Edirne ande deviamos inogurar una ekspozision sovre las kartas postales de Edirne. Esta fue la segunda. Unos kuantos anyos antes, antes del Covid, realizimos por la primera vez una ekspozision sovre estas kartas. Metin Delevi era el kurator de esta ekspozision. Esto fue realizado de las koleksyones de los koleksyonarios: Edip Ağaoğulları; Roy Arakelian; Bülent Bankacı; Nezih Başgelen; Cengiz Bulut; Gökhan Demirer; Mehmet Günyeli; Silvyo Ovadya i Cengiz Ülkerdoğan. Arekojimos mas de 500 kartas postales istorikas. Esta vez muestra amiga, Emel Benbasat realizo esta ekspozision kon Bella Parlakşimşek. Emel fue la kuratora de la ekspozision. I kreo ke se deve de realizar un livro sovre este trezoro. Edirne de punto de aktividades kulturales fue una sivdad muy emportante. I kreo ke es la sivdad ke poseda lo mas muncho de Kartas Postales entre las sivdades. Es djusto ke egziste mas munchas kartpostales sovre Istanbul. Ma Istanbul no es una sivdad, es un metropol muy emportante. En la seremonia ke se realizo, el Mayor de la sivdad, Recep Gürkan estava pronto i mos dyo munchos detalyos sovre estas kartas. Kreo ke esta ekspozision se va pueder vijitar durante a la manko tres mezes.
La semana pasada se realizo una otra reunyon ande se avlo de las vijitas sovre Pera i Galata. Es una kaza de arte ke realizo esta reunyon en la kaza de un ombre de arte. I dyeron karar de dar una lugar emportante a los Kamondos. Reelmente los Kamondos tyenen un lugar muy emportante en la oksidentalizasyon de muestra sivdad. Son los Kamondos ke mos ambezaron a fraguar apartamentos para alkilar. Los yamamos hanes. Son eyos los primeros ke mos ambezaron komo funksyona una munisipalidad. I empesaron kon el “6. Daire”. Estavan pensando ke van a realizar 20 arondissements (daire) en Estanbol. Ma es solo en Tarabya i la Büyük Ada (Prinkipo) ke realizaron a formar dos munisipalidades dospues de Beyoğlu-Galata. Ya se save ke oy en diya la Munisipalidad de Beyoğlu se topa en el mizmo edifisio. A la fin de este torno, el Arkitekto Büke Uras va organizar una ekspozision sovre los Kamondos kon los dokumentos ke poseda. Pera i Galata reelmente son dos kuartieres rikos de punto de vista istoriko.
