En el empesijo de mi vida (para no dizir en mi chikes) moravamos munchos judios en el entorno de la Kula, Galata. Los vizinos, las eskolas, los kales, los merkaderes, todos eran judios. Biviyamos en una ermoza armoniya. En supito oyimos ke Fulanika se esta indo. Se estan tashineyando. Atyo! Ande bueno? A Shishli. Kualo? Es a la otra punta de la sivdad. Kon bueno ke moren ayi. No paso muncho tiempo i Sistranika se fue a morar a Shishli. Esto kontinuo komo una ola. Ya saverash la konsejika de los famozos eskrivanos “Los ermanos Grimm” ke se yama “El flutisto del kazal de ratones” (o su nombre orijinal “El flutisto de Hamelin”). Vos azere el rezumen en kurto: Un kazal se aviya inchido de ratones, no pudiyan dezbarasarsen. A la fin vino un ombre al kazal i les disho yo vos va dezbarasar de los ratones ma kero un montante de paras. El shefe del kazal aksepto. Aman dezbarasame de estos ratones, te vamoz a dar todo lo ke keres. El ombre kito una fluta de su aldikera i ampeso a chuflar una melodiya alegre. Pishin ampesaron a salir los ratones en medyo de kada kanton i burako. Lo ampesaron a suivar. Las kalejas se incheron de ratones chikos i grandes. El flutisto estava kaminando i los ratones detras. Asta ke vino al bodre de la mar. El se entro a la mar i los ratones detras. La konseja kontinua ma no es lo ke vos kero kontar, es ke vos kero dizir komo en esta konseja, una famiya detras de otra ampesaron a irsen a Shishli. Siguro kada vizino ke se iva mos deshava muy triste, eran un pedaso de muestro pasado. A las kazas ke se vazyaron en primero ampesaron a vinir famiyas judiyas de Chanakkale o de Edirne o Tekirdağ. Ya estava muy bien. Al menos eran paryentes de los vizinos. Despues de un poko de tiempo, eskapo i este gyoch, ampesaron a vinir famiyas de Anadol. Estas famiyas viniyan de los kazales de Anadol a bushkar echo. No teniyan munchas paras, por esto moravan tres kuatro famiyas en una kaza. Komo en el tiempo de las gerras. Por empesijo no metiyan perdes a las ventanas, metiyan gazetas. Si se rompiya un djam, ya enklavavan un pedaso de tavla o un pedaso de teneke. Estava muy feyo de ver. Kuando los mansevos de estas famiyas ampesaron a takinar i a deranjar las mansevikas, desidimos todos endjuntos a unos a unos a salir de muestro nido i irmos i mozotros a Shishli. Akel tiempo Shishli se eskapava al doredor de la mishkita. El resto era todo bostanes. Despues se developo, se alargo asta Mecidiyeköy. I kon tiempo i de Shishli ampesaron a irsen a Gayrettepe ke era una rejyon mueva, i de aya se fueron a Ulus. Agora estamos espartidos en todos los barrios de la parte evropea i asiatika.
