En el livro de Shemot la fragua del santuvaryo okupa un lugar muy grande. Kuatro perashiyot son apropyados sovre este sujeto. En la perasha de Vayakel meldamos ke Betsalel ben Uri ben Hur ke era del trivo de Yeuda parvino, i reusho kon nombre del Kriyador a fraguar el mishkan, el santuvaryo.
Meldando estas perashiyot, no solo vemos la fragua del mishkan, si no, ke tambien vemos, la enkomendansa del diya de Shabat. En este sujeto, vyene a enbezarmos, el Kriyador, ke malgrado ke el mishkan es una ovra santa, todas las ovras ke son defendidas de azer en shabat, no se puediya ovrar tambien en el mishkan.
La Tora nos enbezo ke el Kriyador kriyo en el enterval de sesh dias el mundo. El Kriyador lo yama a el syeten diya, Shabat. El demando de todos nozotros de santifikarlo i onorarlo. El djudyo ke guadra el shabat i lo santefika atorga ke el Dyo es el fondador del mundo. El puevlo djudyo resivyo sovre si de guadrar el Shabat, el las afirma todas sus enkomendansas kon grande alegriya. Asyende luzes en su kaza i amostra la alegriya del diya de Shabat. Kon el Shabat, Dyo es yamado Kriyador del mundo. Shabat kere dizir dar al ombre un repozo i enforteser la fuersa de su kuerpo. Devemos de azer una diferensya entre Shabat i los diyas de entre semana.
El santuvaryo es yamado ‘kol amakom’ todo el lugar. I el santuvaryo es el lugar onde mora la shehina, la divinidad. Si el mundo era en estado del santuvaryo, el materyalizmo no podestava, ni egzistiya malisya en el mundo, i todas la personas eran djustas. Dunke devemos ser djustos i amar a la djustisya komo izo en la gemara de berahot. Del diya ke se destruyo el santuvaryo, la Tora nos mampara i devemos de estar syempre djuntos kon la Tora. Kuando egzistiya el santuvaryo la ara, el mizbeah onde se aziya los sakrifisyos perdonavan nuestros pekados. Oy el pranso ke es ordenado sigun la ley nos perdona. Dunke onde nozotros lo yamamos, kon korason kumplido, a el Kriyador i el nos responde. Syempre ke nos responda para byen.
