Aldo Sevi
Yo, a la edad de 14 anyos, i mi granpapá estávamos asentados uno enfrente del otro en un balkón ke mirava al debarkader de la izla Antigoni (en turko se yama Búrgaz) en la mar de Mármara, serka de Estambol. La ora era entre 10 i 11 de la demanyana i mozotros estávamos solos en esta kazika de enverano ke apartenía a Salvator Albohayre, un viejo haver de mi padre. Yo estava komiendo serezas de al tiempo, de la kolor del vino, chikas i muy dulses, meldando un livro de Sensia Fiksión, koza ke me plazía muncho en akeya edad. De vez en kuando echava una ojada a los vapores ke sonavan sus sirenas antes de aserkar a la skala. Mi granpapá estava meldando su gazeta turka Hürriyet (Libertad), a la kuala mi padre azía la nariz porké la konsiderava un poko sensasionala por modo de las fotós de las mansevas en bikini en la oja d'alkavo. Ensúpito mi granpapá desha su gazeta i me dize:
"Tu kale ke te agas djugador de básketbol".
Yo, kaji kayendo de la siya, pensando de mi para mi de ande me kitó esto agora, le respondí:
"Dedé, yo no tengo el boy para esto".
-"Pue'ser en Israel, entre los lehlís, no sos konsiderado alto, amá por la Turkiya ya estás bueno.
-"Yo prefero meldar i pensar..."
-"Bre, no te dishe ke te agas djugador de fútbol. El fútbol es para los bovos i lokos - 'Bir yuvarlak, 3 manyak, 22 dangalak' [un redondo, 3 lokos, 22 bovos]. El básketbol es para mansevikos intelijentes kom'a ti. Además kon esto te ambezarías disiplína i devendrías un ombre!"
-"Dedé, tengo 4 anyos asta ke me tomen al askerlik. Ayá, kon kerer o sin kerer, ombre ya me van a azer. Déshame estos 4 anyos de shimariklik..."
-"Shimarik ya sos en kantidad... amá no es tu kulpa... Oye, desidí de yevarvos, la semana ke viene, a tu madre i a ti, i a Rashel (su mueva mujer), en mi mueva Honda a Izmir i Kuşadası. Mos vamos a kedar 4 noches en un otel en Izmir."
-"Dedé, yévamos a un otel lüks, no komo la pansión kon kabiné a la turka en Ayvalık antes dos anyos..."
-"No te merekiyes. Vamos a kedarmos en el otel mas lüks de Izmir! Si nó, Rashel no viene..."
Mos fuimos a Izmir i a Kuşadası, kedimos en un otel lüks... Mi granpapa kontinuo a reprosharme por ser shimarik... Un anyo i medio despues muryo en un aksidente de otomobil, despues ke se enborracho bueno, el i su mujer, Rashel en un klub de noche. Tenía 73 anyos.
