Varios ombres de sensya espanyoles, komo José Erugo, Celso García de la Riega, Otero Sánchez i Nicolás Días Pérez, estuvieron investigando si Kolomb era un marrano.
Kolomb ke era konosido en Espanya komo Kristof Kolomb i no saviya italiano, en su testamento ke afirmo el 19 de mayo de 1506 izo sinko djuzgamientos kuriozos. Dos de sus dezeos – diez por sien de sus bienes se iva dar a los proves i a las ijas proves para ke pagen sus dotas. Esto es una de las kostumbres judias. Tambien se iva dar paras a un judio ke biviya en la entrada del barrio judio de Lizboa.
En estos dokumentos, Kolomb metio una firma triangular de puntos i letras ke paresen a las enskripsiones ke se enkontran en las tombas de los semeterios judios en Espanya. Kolomb ordono a sus eredores ke utilizen la firma fina la eternidad.
Segun “La Istoria de los Marranos” del istoriador britaniko, Cecil Roth, el anagrama era un substituto kriptiko del Kaddish, ke es una orasion resitada en la sinagoga por los dolientes despues de la muerte de un pariente serkano. Ansi, Kolomb ordono a sus ijos de dizir Kadish a la onor de sus padre kriptojudio kuando se murio.
Finalmente, Kolomb desho paras para ayudar a la kruzada ke esperava ke sus suksesores ivan a empleyar para liberar la Tierra Santa.
Estelle Irizarry, profesora de linguistika en la Universidad de Georgetown, analizo el lenguaje i la sintaks de sienes de letras, diarios i dokumentos eskritos de la mano de Kolomb i konkluyo ke la lingua prensipal eskrita i avlada del eksplorador, era el espanyol kastiliano. Irizarry ekspliko ke el espanyol kastiliano del siglo XV era el “yiddish” de los judios espanyoles, konosido komo “ladino”. La parte superior en la siedra de las 13 letras eskritas por Kolomb a su ijo Diego kontenia las letras ebreas eskritas a mano (bet-hei), ke sinyifikan b'ezrat Hashem (kon la ayuda de Dio).
Durante siglos, los judios obzervantes empleyaron por kostumbre esta bendision en sus letras. La sola letra ke eskrivio a Diego en la kuala no metyo esta benedision, fue la letra dirijada al rey Fernando.
El livro de Simon Weisenthal, “Sails of Hope”, sostiene ke el viaje de Kolomb estuvo motivado por el dezeo de enkontrar un refujio seguro para los judios duspues de sus ekspulzion de Espanya.
Carol Delaney, antropologa kultural de la Universidad de Stanford, konkluyo ke Kolomb era un ombre profondamente relijiozo, i su buto era navegar a Asia para obtener oro en finansando una kruzada para tomar atras Jerusalem i rekonstruir el Templo por los judios. En la epoka de Kolomb, los judios kreian ke Jerusalem devia ser liberada i el Templo rekonstruido para kuando iva vinir el Mashiah.
Kolomb iva salir al viyaje el 2 de agosto de 1492, un dia ke koinsidia kon Tisha B’Av. Por esta razon remetio esta data.
El viaje de Kolomb no fue finansado por la reina Isabel, komo lo kreen, sino por dos judios konversos, Luis de Santangel i Gabriel Sanchez ke emprestaron un montante sin intereso de 17.000 dukados a Kolomb para ayudar a pagar el viaje. Las dos primeras letras ke Kolomb embiyo en el empesijo de su viaje no fueron a Fernando ni a Isabel, sino a Santangel i Sanchez, remersiandoles por sus apoyo i kontandoles lo ke aviya enkontrado.
