Esta semana entrimos al mez de Ramadan del kalendaryo islamiko. Es el mez el mas santo del anyo. En este mez los muzulmanes azen tanit. Un mez entero sin komer, bever ni mizmo fumar. Ma este tanit no parese al tanit de los judios. Los judios azen tanit un diya ma 26 oras enteras. Los muzulmanos ampesan el tanit antes ke se alevante el sol, ke lo yaman Sahur, i komen despues ke se desparesyo el sol, ke lo yaman Iftar.
Ramadan es un mez muy ermozo. Se gizan las mijores komidas, kada iftar envitan paryentes o vizinos o amigos. Se manda komidas a los menesterozos. I la ora del iftar se aspera kon grande emosyon i alegriya. Entre las dos minaretas se eskrive kon luzes biervos ermozos para este mez santo. El ken mora serka las mishkitas, asperan ke se asyendan las luzes de las minaretas i ke ampese el imam a meldar el ezan, para dar haber ke ya pueden komer. Ay lugares ke echan tiros. Se oye el sonido del tiro, i se ampesa a komer. Se asenta kon grande alegriya i por primera koza se kome o una azituna o una datile i despues de todo bueno ke ay en las mezas. Por preferensya una supa es preferable.
Vendremos al sahur. Ay una uzansa muy orijinala. A medya noche verso la demanyana kale alevantar a komer. Antes no aviya ni alarm en los telefones, ni ora ke sona kuando keres. Por esto aviya personas ke tokavan el daul. Kada kaleja teniya su dauldju. Mes entero kaminava su kaleja en tokando el daul i en mizmo tiempo kantava poemas.
Por egzemplo:
Ya vino Ramazan el mes sagrado
Ke seya el bienvenido
Kon orasyones i alegriya
En las mezas de iftar abundansya i amor
Kon muestras poemas alavamos al Senyor
I komo estas munchas mas poemas eskritas i kompozadas por el dauldju. A la fin del mez, este ombre kaminava entre el diya por su kaleja i asperava ke le den bahshishes. De kada ventana le echavan paras. Oy en diya esto kontinua komo nostaljiya.
Otruna tradisyon de Ramazan son las pitas. Estas pitas no se topan entre el anyo. Son espesyalmente para este mez. Las pitas salen serka del iftar. Las personas azen kola delantre de los ornos para yevar las pitas kayentes a sus kazas. Ken kere mete manteka, ken kere Shokella o otra koza. Todo modo, mizmo a sekas son muy muy savrozas.
En rejyones ande moran las famiyas non-rikas, la munisipalidad fragua chadires i dan a komer debaldes las oras del iftar. En vezes los ke lavoran por akeyas partes i no pueden alkansar a irsen a kaza para komer en su ora, entran i azen el iftar en estos chadires.
Otra tradisyon de este mez es el dulse de savor de boka. I este dulse ke se yama Güllach es espesialamente para Ramazan. Son unas filas de almidon (nişasta) ke se mojan kon leche i asukar i agua de roza, i ensima se mete muezes majadas i granos de agranada. Se kome yelado i es muy savrozo.
Sigun el kalendaryo islamiko, los mezes kayen kada anyo a 10 diyas mas antes. Ansina es ke Ramazan kaye en vezes en invyerno o en vezes en enverano. Invyerno es kolay ma en enverano azer tanit es mas difisil, por modo de la kalor i los diyas largos.
