MUZIKAL kualo es?
En kurto puedemos dizir ke “muzikal” es un djenero teatral ke mostra el sujeto, kon kantikas i bayles. En la istorya del muzikal vemos ke sus raises vyenen del teatro grego antiguo. Seya komediyas, seya melodramas se mostran kon kantes i bayles.
El 12 del mez de Marso tuve el onor de ser envitada a un muzikal, kabare teatro, nombrado “NO NAME”.
Todo enpeso kon un telefon de mi kerido direktor de teatro, FERİT KOEN.
“Forti estamos aparejando un proyekto kon CENK ROFE; tenemos menester de tu ayuda. Esta noche ven a la prova i avlamos”.
“Esta noche”?
Komo esto auzada de mis ijos, todo a la ora orada, de vista le dishe " ya vengo".
Digamos la kestyon, kuando se trata de teatro para mi no ay “no”. Sovre todo dos mansevos presyados ke lavori anyos en el klub, “DOSTLUK” me demandaron ayuda, no es posivle de dizir no.
Kuando arivi al adreso ke me dyeron, un grupo de mansevos me aresivyeron kon karas riyentes i kon grande karinyo, komo si ay anyos ke mos konosemos. Tomimos el kafe de oras de tadre, akeya ora demandi kualo es lo ke estan aparejando.
Me respondyeron kon un slogan:
“NO ES NI TEATRO, NI KABARE, NI KONSER ama es
I TEATRO I KABARE I KONSER.
Para entender asperi ke empesen a meldar el teksto. Jeneralmente en las provas no se entyende muy byen ma komo tengo eksperiensa de los teatros ke djugimos, ya entendi ke va ser muy amuzante.
El sujeto en resumen es, la propya vida de un kantante ke no pudo azerse famozo i las mujeres de su vida.
En este program espesyal, vimos la aktrisa maraviyoza NESLİHAN YELDAN ke konosemos de los teatros ke djuga i de las serias de televizyon. Aki djugo 14 karakteres de mujeres diferentes, ke kedi enkantada de su performansa alavada.
CENK ROFE akompanyo su partonera kon aryas, kon kantikas de muzika Turka, kon kantikas populares de los anyos 1980 i 1990.
Veramente un festival de aksyones, kualas komik, kualas trajik.
Dirijado por: YEŞİM ÖZSOY
Produktor: FERİT KOEN
Direktora muzikal: CEYDA PİRALİ
Koreografiya: TUĞÇE ULUGÜM TUNA
Efekt i luzes: AYŞE SEDEF AYTAR.
DEKOR: SEMİH BAŞARI.
Vos rekomendo definitivamente de ver este famozo muzikal / kabare / teatro en ZORLU PSM stüdyo. Repetido al 26 Marso 2024.
Estos i munchos FERİT KOEN i CENK ROFE.
