A las personas les parese ke si esta todo ermozo, i si los echos estan en regla, syempre será este modo, i por esto gasta babam gasta.
Gastar es un problem aryento de las personas, ay u no ay, kale ke gasten malorozamente. No ay dizir amanyana si no kedo, kualo va azer.
Ken ke bivyo prove i dospues se izo riko, save mas muncho la valor de la vida, i de los byenes, de las paras. Ken era riko i se izo prove (komo en el Varlik) save mas muncho las valores. Mi padre me diziya kuando aze luvya, inche los kuvos.
Agora el mas grande problem es gastar. Malorozamente la situasyon no solo en el paiz ke estamos bivyendo ma en el mundo entero esta muy negra. Esto remarkando ke el mundo esta paresyendo a una otra versyon komo la de 1940 i el tyempo de la gerra fria.
La jenerasyon muestra ya savemos todo esto lo ke paso muy bien, ya vimos todo, suvimos i abashimos, en un diya mos izimos proves, i en un diya rikinyones.
De agora en delantre kale ke estemos, para estar en pyes kon fuersa kale azer muncho dikat a los gastes. Si es posible, no daremos fotos de viyajes, de restoranes; kale ke pensemos a los diyas ke van a vinir. Kale tomar leson de los diyas ke pasimos antes.
Esto kale ke agamos para la jenerasyon mueva, por los ijos. Porke eyos nasyeron kon la teknolojiya mueva i todo pronto i ermozo, no saven lo ke paso en el mundo; solo esta eskrito en las ojas, ke no veyan amargura. Ya saven ke la vida esta muy dura, i eyos estan pensando a la situasyon, komo van a parvenir, ma malorozamente la jenerasyon mueva esta gastando, gastando sin pensar. Para gastar kale ganar. Por esto kale ke seamos komo egzemplo por eyos, i por los ke vyenen.
Syempre echa agua al pozo, para bever kon repozo.
Al vermos, en diyas buenos...
