|
Komo de uzo un evenemento ke paso en el mez koryente… Anyos i anyos, la palavra "Polaroid" fue sinonimo de 60 segundos de fotografiya instantanea, en un tyempo, en una epoka en la ke los amantes de la fotografiya deviyan de kitar los kartushes i de yevarlo a un profesyonal o azer su propyo 3 prosesos para obtener las fotografiyas. Dr. Edwin Land, uno de los ko-fundadores de Polaroid Corporation, nasyo el 7 de Mayo de 1909 en Bridgeport, CT, ijo de Martha (nasida Goldfaden) i Harry Land, imigrantes Djudios de la Evropa del Este. Land empeso a estudiar kimika en la Universidad de Harvard en 1927, ma abandono sus estudios despues de su primer anyo para lavorar en sus propyos eksperimentos sientifikos. Bivyendo en la sivdad de Nueva York, pasava los dias en la Biblioteka Publika i las noches “tomando emprestado” un laboratoryo de la Universidad de Columbia. Este anyo invento el primer filtro polarizador utilizavle. Torno a Harvard por tres anyos, ma lo abandono de muevo i avryo los Laboratorios Land-Wheelwright. En 1937, su echo empeso a yamarse Polaroid Corporation. La teknolojiya polarizadora terrestre se empleyo en un grande nombre de inventos, inkluzo instrumentos de vizyon nokturna, instrumentos 3D, ekranes de kristal líkido (LCD) i inkluzo el avion de espionaje U-2, afilu syertos de estos fueron empleados para el uzo de las fuersas aliadas durante la Gerra Mundial, la Segunda Gerra Mundial i djugo un rolo importante en la reushita i viktorya. El 21 de Febrero de 1947, Land prezento al mundo la primera kamera instantanea. La “Land Camera” vino a la plasa un poko antes de dos anyos despues. Al empesijo de los anyos 70, la teoriya “retinex” de la Vista en kolor de Land permityo a Polaroid a desvelopar la kamera instantanea en color SX-70. El 27 de Julyo de 1982, Land demisyono de su posto de prezidente de Polaroid despues de la inkapachidad finansyeros de Polavision, la mueva inovasyon de filmos instantaneos de Polaroid ke rezulto en un dezastro finansyero. Land fue en primera plasa un sientifiko i despues un direktor egzekutivo. Aunke Land es konosido en el mundo por su kamera Polaroid, en realidad tyene mas de 500 patentes. Dr. Edwin Land muryo el 1 de Marso de 1991. Polaroid Corporation deklaro su fayito el 11 de Oktubre de 2001. |
