PURİM es una fyesta djudiya, selebrada anualmente el 14 del mez djudyo de Adar, en komemorasyon de una djudiya ke se yamava Ester, i ke guadrava ke era djudiya.
El nombre Ester en ebreo sinyifika “me eskondere”.
La reyna Ester durante muncho tyempo guadro el silensyo sovre su verdadera identita, para apareser solo en el momento apropriado.
El livro de Ester mos konta, ke el rey de Persya, en lugar de matar a todos los djudyos de su reynado, le aviya ordenado a su ministro Aman, de matar a los enimigos de los djudyos en todo el imperyo. El rey mete a Mordehay, el tiyo de Ester al lugar de Aman.
Esto mos aze pensar ke “Purim” es konsiderado uno de los dias mas alegres del kalendaryo ebreo.
En Purim meldamos kon boz alta la “Megila de Ester”.
Esta fyesta es syempre muy apresyada por el djudaizmo.
La Megila Ester es biblika, en forma enroyada i konta la istorya de komo la reyna Ester i Mordehay salvaron la vida de los djudyos de Persya.
Purim es el karnaval de los djudyos. Los djudyos selebran esta fyesta en oyendo la Megila Ester.
Las Mitsvas de Purim empesan kon Taanit Ester, ke se aze el 13 del mez de Adar. Es el rekuerdo de la data, ke Aman aviya desidado de eliminar a todos los djudyos.
La “Megila Ester” mos ambeza ke las difikultades de la vida ke enkontramos, son un egzamen para ayegar, para arivar a lo mas mijor, ke los detenimyentos son okazyones para desveloparmos.
I esto todo vyene de la mano del Dyo ke no vemos, i ke mos gia el destino.
Para azer onor a esta fyesta, las famiyas i los amigos se arekojen al doredor de una meza adonada de komidas spesyales. Se kome, se beve i todos estan orozos.
Komo dulsurya se kome las orejas de Haman i mavlachas.
En la grande partida del mundo se selebra en estos dias, la animasyon del karnaval. Las kayes de la Evropa, Estados Unidos, Canada i Sud Amerika estan prontas para resivir kolores egzuberantes, vistimyentas tradisyonales.
Keridos Lektores, vos oguro un Purim alegre kon vuestros keridos kon pas en el mundo entero.
“HAG PURIM SAMEAH”
