En entrando en este mez de alegriya avlaremos en primero de los shekalim donde se melda la Perasha i la Aftara en estos diyas. El biervo shekel es konosido por todos donde el sensyo verdadero vyene de pezar. Echaremoz un ojo a la Perasha i Aftara de este tema.
En el tyempo del Bet-Amigdash, kada Judyo era ovligado de dar un dono de medyo shekel para atakanar i enderechar diferentes partes del Bet-Amigdash, lo ke se yamava Anyada de Shekel. En Nisan se empesava a arekojer shekalim del mez de Adar. Todo Judyo riko u prove sin dinguna diferensya era ovligado de partisipar en este dono del shekel. El Beth-Amigdash komo savemos era el sentro spiritual del Judaizmo i para kada uno era komo el seno de su madre, un abrigo de amor i seguridad. Es en el tyempo del Rey Yoash ke se instituo este dono i la razon de dar solo medyo shekel al lugar de uno entero es atado a la razon ke el Livro Santo del Zoar mos explika i mos ambeza ke kada persona es formada de 2 partidas, su savedurisya ke le vyene de diferentes manaderos, de sus serkanos, sus maestros de la sosieta entera, de sus paryentes, i la otra parte es su propyo lavoro, su experiensa sus esforsos. El medyo shekel es komo una devda ke se paga a la sosyeta; el medyo shekel amostra la igualdad entre todos los miembros del puevlo. Delantre la Tora todos semos iguales, el Rey Yoash kijo avrir una era mueva despues del Reynado maldicho de la Reyna Atalya ke keriya azer despareser totalmente el puevlo de Israel, su Ley i su Fey. En el mez de Adar antes de Purim ay otra data emportante de la kuala devemos avlar: es el 7 Adar, diya ke se yama "Diya del Soldado deskonosido". Soldados donde no se save ande i kuando kayeron en la gerra, se melda orasiones en Israel en todas las Keilotes i en los simeterios en memorya de los keridos. La razon de esta data es atada a la disparision de Moshe Rabenu ke no se save ande i en ke momento i el lugar de su muerte. El Sinyor del mundo le aviya amostrado de leshos la Tierra Santa ande el no iva ayegar a entrar, i el desparesyo delantre la facha del puevlo. Un diya despues kon a su kavesera Yeshua Bennun, disiplo kerido de Moshe a ken aviya dado la SHEMIHA, la pasasion de sus poderes, el puevlo tomo el kamino de la konkista verso la Tierra d’Israel prometida a su puevlo por su Dyo Bendicho. Antes de Purim kijimos kontar estos faktos i evenimyentos, kontinuaremos a avlar en otro teksto de la facha sekreta de Purim i de la Megila d’Ester, Reyna kerida, Hadasa, Ester Istar, Estreya de la manyana i del mesaje ke mos da este Rulo, ke sigun los savyos en la fin de los tyempos, todos los eskritos i Livros Santos se van a despareser i solo se meldara la Tora i la Megila d’Esther.
Oguramos Alegriya, Pas i Amor a todos muestros ermanos leshanos i serkanos, Amen
