Esto eskrivyendo este artikolo djusto dospues de las eleksyones en la Rusia.
Ya savemos ke dos semanas antes, el Sinyor Aleksey Navalni - un kapo emportante de la opozision - se muryo en la prizion. Su mujer ke no bive en Rusia disho ke es Putin i su ekipo ke organizaron la muerte de Navalni. Ya se save ke unos kuantos anyos antes fue entonsegado i son los Alemanes ke le salvaron la vida. Dospues de tantos anyos entendimos ke dingunos no pueden ganar en la Rusia si Putin no kere. El rezultado de las eleksyones es ke Putin gano kon mas de 80% i fue elijido prezidente no se por la kuantena vez.
Malorozamente esto egziste en munchos payizes.
Dizen ke la demokrasia es muy emportante en los Estados Unidos.
I aya vemos ke los Republikanos no fueron muy kapaches para topar un otro kandidato ke Trump. Reelmente no es muy demokratiko de tener un kandidato komo Trump. Los Demokrates no fueron mas kapaches. Biden no es puedeser tan aedado. Ma tyene todas las faltas de un ombre de 80 anyos. Reelmente los Estados Unidos i La Rusia son los dos payizes los mas emportantes para la PAS en el mundo.
Asta la fin del anyo vamos a ver los dos prezidentes de los mas emportantes dos payizes.
Mismo ke son eleksyones munisipales vemos problemes emportantes en muestro payiz, en Turkiya. Estanbol, Ankara i İzmir: en estas tres sivdades biven mas de 25 milyones de sivdadinos. I la prezidensia de las munisipalidades de estas tres sivdades es muy emportante para el AKPARTİ ke es el partido en el poder. I para el CHP ke se topa en la opozision. Espero ke estas eleksyones se van a realizar en una atmosfera kalma.
Kreo ke estas eleksyones i su rezultado es muy emportante para el avenir de muestro payiz.
Kreo ke en el 2024 mas de 70 payizes en el mundo van a bivir eleksyones. I esto todo es muy emportante para el avenir del mundo entero…
