The Zone of Interest es el filmo de Inglatierra ke gano el Oskar Internasional de este anyo. Adaptado por el distingido eskrivano i direktor inglez, Jonathan Glazer, el filmo esta amostrando la vida de kada diya de Rudolf Hoss, su mujer Hedwig i sus ijos. Sus kaza luksuoza esta situada entre los rayes del treno i las kamaras de gaz afuera de Auschwitz, ke era el kampo de konsantrasion aleman en la Polonya okupada. Rudolf es el komandante del kampo.
La primera shena del filmo esta amostrando un grupo de personas metiendosen al sol i aziendo piknik al lado de un ermozo lago. Hedwig les esta ensenyando a sus ijos los nombres de las rozas en sus guerta; entremientes las mosas les esta sirviendo fruta a los invitados.
Rudolf duspues de la komida de midi, se esta metiendo a lavorar en un echo monoton i aburrido. Duspues de midi, se estan aparejando komidas delisiozas por la noche. Las mujeres se estan aprovando fostanes i kozmetikos. Hedwig parese muy kontente kon un muevo manto de vizon. Esta pensando un momento para entender de ande vinieron estas vistimientas. Duspues la realidad esta empesando a salir en medio, a poko a poko, kon kayades i sin insidentes.
No ay shenas de atrosidades, ma un poko mas aya esta Auschwitz. Las bozes de las armas ke a las vezes se estan oyendo de leshos son parte de un diya normal. Las mujeres estan aziendo dedikodu sovre kozas sin emportansa. En lugar de djugetes, las kreaturas estan djugando kon una koleksion de dientes de oro, inyorando el umo ke esta saliendo de las chimeneas al otro lado de la pared.
En lugar del merkado de valores, las konversasiones de los ombres se estan sentrando en ke karar de tiempo va tomar kemar 700 judios al dia i eliminar las sinizas. Las kamaretas estan yenas asta el techo kon los furnimentos de las personas inosentes duspues del eksterminio masivo de todos los judios en Polonya.
Estamos en los dias dalkavo del Olokosto, i kuando los privilejios de sus vidas se estan aminguando i kon los ordenes de Berlin, la famiya esta trokando de kaza i estan pasando a una pozision mueva. Hoss esta empesando a preokuparse por su futuro. Hedwig esta pensando su estado duspues de agora.
El filmo esta muy bien echo. Al fondo, las bozes de los prizonieros, el umo ke se esta elevando de las kamaras esta aziendo un kontraste entre lo ke estamos viendo i lo ke savemos.
El filmo esta echo teknikamente briyante. El direktor esta reprezentando el orror del Olokosto de una forma indirekta. Los espektatores se estan sintiendo inkomodos en kontemplando el filmo. Jonathan Glazer adapto este filmo de la novela de Martin Amis.
Estamos suivando la vida kotidiena de una famiya ke estan biviendo en kompleta negasion de lo ke esta afitando afuera de eyos. La famiya esta biviendo en un mundo serrado. El tema prensipal del filmo es la opozision entre amar su famiya i azer una terivle indjustisia kontra las famiyas de los ajenos.
