Semana de Respekto a los Mayores, Marso 18-24
Vos kero demandar, komo keresh envejeservos? Una demanda muy kritika. Esta semana es “Semana de Respekto a los Mayores”.
Esto remarkando kada dyes anyos se esta trokando todo lo ke savemos. Afilu sea en salud, en medisina, en edukasyon, sea en muestra alimentasyon. Lo ke savemos, ke son korektos, kon tiempo se esta azyendo inkorektos. Ama ay una koza ke mas muncho estamos alkansando a las informasyones. Aryento de estas todas informasyones, tenemos derechos de eskojer lo ke puede akseptar muestra sensya i eskojer komo keremos pasar muesta vida i envejesermos.
En vezes estamos rekontrando a dos personas de mizma edad. Los dos estan en los ochenta, el uno esta dinamiko, en su echo, en sus aktividades kultural, en sus entornos sosyal i el otro en su kyoshe, asentado en su fotolyo, bivyendo sedanter. Sedanter es un biervo ke estamos sintiendo muncho oy en dia, en medikeria. Sedanter es el ke no le plaze azer aktividades sea chiko sea grande, independyente de edad.
Estamos en un mundo ande la publikasyon se esta envejesyondo. La vida de la persona se alargo bastante i esto esta trayendo un pezgo enriva de la ekonomiya. Oy en dia la medisina esta penando para garantizar ke las personas puedan kontinuar sus vidas sin hazinuras, para ke no apezge la ekonomiya. Estan perkurando a ambezar komo estan bivyendo las personas aedadas de mas de 100 anyos. Dizen ke una persona si entra a los sesenta kon muy poka hazinura va bivir mas sano en las noventa. Por esto kale trokar las uzansas de muestro modo de bivir. I pensaremos: si una persona se retira en los sesenta tyene delantre de el unos vente o ventisinko anyos para azer mizmo una kariyera mueva.
El livro de John Medina, "Brain Rules" (Reglas del Meoyo), mos konta sovre dos personas. I los dos, mas o menos kaji en los ochenta. Jim i Frank. Jim es un ombre ordinaryo i Frank es un ombre famozo. Jim biviya en una kaza de vyejos i ya se estava viendo ke estava chokteado, asentado en la sia kon karucha. Frank es un arkitekto. Estava en un roportaj en la televizyon kon el famozo jurnalisto, Mike Wallace. Las repuestas ke estava dando al jurnalisto estavan amostrando toda la kapachidad de su meoyo. Estava mentalmente briyando. Teniya una vizyon perfekta. I despues en los noventa en 1959, kompleto el dizenyo del muzeo Guggenheim en Nueva York.
Jim i Frank bivyeron en los mismo anyos. Komo eran tan diferentes? Komo eyos munchos ansina estan okupando al mundo de siensya, komo bivyeron fin a esta edad? Ay unos faktores ke puedemos saver de ke kadar mos vamos envejeser?
La repuesta la mas valutoza era “azer egzersizes”. Las personas ke azen egzersisyo tienen mijores kapachidades mentales ke los ke son sedanteres. No muncho egzersiz, un poko kaminar a pye afilu vente minutos al diya en el bodre de la mar o aryento del parko vos troka el meoyo. Vos aleshash de depresyon i de demansia. Egzersiz es mas muncho seratonin, mas muncho dopamin i mas muncho noradrenalin. Afilu las kreaturas ke azen egzersizyo son mas reushidos en estudios akademikos. El puerpo tyene menester de oksijen i de alimento. Esto es posible kon egzersiz maksimizado. El egzersizyo fortaleza tu puerpo i tus musklos.
I otros mas: bever agua, tener un buen esfuenyo, de noche no mirar a los telefonos o a las komputadoras, komer i bever provechozo.
Vos konsejo este livro ermozo. Se puede meldar muy fasil, kon sus eksplikasyones ermozos i eglendjeli. John Medina es un biyologo molekular sovre sensya i meoyo. Vos konsejo para meldar el kamino de envejeser sanos i rezyos, siguro ke se kere i un pokitiko de shans; ke dizish?
