Esta semana estamos selebrando la fiyesta de Purim. No tuve bastante haber, ma ya se ke la eskola Djudia de Ulus diya de alhad selebro la fyesta de Purim en muestra eskola. I supe ke aviya una fyesta en la Sinagoga de Ortaköy. I disheron ke mas de 350 personas estavan prontos en la sinagoga.
Esta semana tenemos las eleksyones munisipales en muestra sivdad i en muestro payiz. I reelmente estamos viendo un pleto bastante emportante entre los partidos politikos. El partido de la siedra no kere dar atras los metropoles los mas emportantes de muestro payiz ke gano sinko anyos antes. Malorozamente el payiz esta divizado en dos partidas. De una parte los ke dan emportansa a la relijion; i de la otra vanda los ke dan emportansa a la laisidad i a la demokrasia. Una situasion bastante difisil.
El mayor de Estanbol, el sinyor Ekrem İmamoğlu, estas semanas de alkavo antes de las eleksyones, kada semana esta inogurando un muevo sit istoriko. I el puevlo de muestra sivdad se estan indo a estos edifisios istorikos.
Es diya de alhad ke topimos la posibiliad de vijitar el tersane de Haliç ande fue restorado i fraguado un Muzeo: El Muzeo Istanbul Sanat. Reelmente aviya una ekspozision muy emosyonante. Aviya syenes de tablos de diferentes koleksyonarios.
Estava ekspozado el tablo del emperador Fatih pintado por el pintor italiano, Gentile Bellini. Esta ovra fue merkada en Sothebis por la Munisipalidad de Estanbol. Reelmente era muy emportante de merkarla por muestra sivdad i por muestro payiz.
Espero ke la semana ke viene vamos a avlar i eskrivir sovre los rezultados de las eleksyones munisipales.
