Kada vez ya vos digo ke para mi el “Viyajar es una pasion”. Mis eskrituryas las eskapo kon esta dicha. El Viajero no puede estar sin azer suenyos. Yo en tornando del viyaje, en el avion empeso a pensar ande me puedo ir mas. Empeso a kaminar en los suenyos. Despues de kaminar tantos paizes i sivdades ami me esta vinyendo mas enteresante los paizes ke tienen kulturas diferentes. En la Evropa i tambien en los Estados Unidos i Canada, todas las kulturas se paresen. En leshano oriente i en los paizes de Afrika, las kulturas son muy diferentes. Los templos, las komidas, la muzika son muy enteresantes i diferentes. En kaminando el mundo, sales del prejuisio. Antes de irte a estos paizes, pensas i sontas otro modo. Despues de tornar del viyaje dizes no pensi ke iva enkontrar este modo de djentes i sivdad. Por egzemplo, kuando mos fuimos a Bangkok, Kuala Lumpur i Singapur todo la kultura estava diferente. Las kayes tambien estavan golyendo diferente. Porke en Bangkok en las kazas no ay mupakes. Por esto las djentes toman las komidas de las kayes ande se venden. Vide tambien supa se estava dando en bolsa de plastika. Se vende en las kayes eskorpiones, saltamontes, guzanos diferentes, meoyos de maymunas, solo de ver te viene muy enteresante. Las frutas son tropikales. La savor i la golor son muy ermozos i diferentes. Kuando te vas a los templos be Budistos o Hindus de ver komo estan orasyonando te viene muy enteresante. Kuando mos fuimos a Maroko tambiyen i aya aviya enteresantes kozas. En primero ay aya la kultura de Arabos i de Berberis. Las vistimyentas de los ombres eran komo entaris. Las mujeres teniyan en los ojos maskara i en las manos henna. Los moskitos no paresen a los daki. Las minares son kubikos, no son komo las de aki.
La kultura gastronomika tambiyen es enteresante. En las komidas mas muncho de arroz estan komyendo kuskus komo la semola muestra. Las karnes i las gaynas estan kozyendo aryento de oyas de tierra ke yaman, Tajin. Ay paizes ande no les plaze travarsen fotografiyas, ay paizes ke kuando orasyonan no les gusta ke los mires. Ay paizes ande no les plaze muncho avlar i si no les demandas, no te responden. Ay paizes ke sin demandarles te saltan ensima para ayudarte. Por esto me gusta konoser diferentes kulturas.
Viajar es un pasion.
