En todas las partes de Alemanya estavan kemando los livros de Brecht, Einstein, Freud, i otros intelektuales en kantando el imno nasional aleman. Para eyos estos judios no estavan reprezentando el “espirito aleman”. La mueva ideolojia del shansolye Hitler era de azer una rasa pura de verdaderos alemanes i su pensamiento era: “un sistem bazado sovre los intelektuales, es un sistem flako”.
Komo todos los profesores judios alemanes, enamorados de sus paiz, el profesor Alfred Kantarowicz, engrandesido en Berlin tomo su diploma de dentist en 1900 i despues se metio a estudiar la medisina entre 1901-1905. Partisipo voluntarmente a la Primera Gerra Mundial i a la torna empeso a ensenyar en la Universidad de Bonn. Despues de la gerra el puevlo demoralizado, empeso a ser influensado por la propaganda ke perdieron la gerra porke los komunistos, los sosialistos, los judios son traidores. Hitler ordono de aleshar a todos los judios de las Universidades i Kantarowicz fue denunsiado por su elevo a la polisia. Fue embiyado al kampo de Borgermoor.
De otra parte en Turkiya, Mustafa Kemal estava fundiendo un payiz demokratiko, kon sus universidades i fabrikas. Profesores judios alemanes empesaron a venir a la Turkiya, ma el profesor Kantarowicz estava detenido en el kampo. Kon la demanda de Atatürk a la Alemanya, el profesor fue embiyado en 24 oras a la Turkiya. El fue el fundador de la fakultad de dentistas ke se izo 4 anyos en lugar de 3, i izo diviziones de ortodentia, periodentia i protez. Eduko a munchos elevos i dizen ke izo los protezes de Atatürk i del Shah Rıza Pehlevi.
Kantarowicz era un ombre sportivo i le plazia skiar. Arekojia sus amigos profesores para bushkar un monte konviniente al ski. Empesaron a skiar en Uludağ. Eyos fueron unos de los primeros ke dieron fama a Uludag komo estasion de ski i kon tiempo se empeso a konstruir oteles.
Alfred sirvio 17 anyos en la Universitad de Estanbol, i en 1946 demando la nasionalidad turka ke no fue akseptada. Despues de una vida tan tormentada, torno a su Universitad de Bonn i termino ayi su vida en 1962 a 82 anyos.
