Despues de Purim vyene Pesah. Pesah vyene syempre en el empesijo de la primavera. Aserkando Pesah en mizmos tyempos, se selebra Paskalya i Nevruz. En todo modo de lugar los guevos boyadeados de kolor a kolor salen a las vitrinas. De los primeros tyempos fin a oy el guevo es un sembol. El sembol de no-egzistensiya pasando a egzistensiya. Debasho de su delgada kashkara, abriga una enerjia de vida. Komo una persona ke aspera renovarse, i la naturaleza se renova. La umanidad syempre tyene el dezeo de muchiguar i de bivir. I el guevo kon la forma oval syempre sembolizo la transformasion de la vida.
Todas las investigasyones akademikas mos eksplikan desde los Keltes o Ejiptos, todos los pueblos ke egzistian en tyempos pasados, kreeron ke el orijin del mundo es komo el guevo. Mozos tambien en las mezas ke aparejamos sean alegras, sean tristes, metemos guevos al pranso. En Nevruz i en Paskalya, los boyadean de kolor a kolor. Mozos para boyadearlos buyimos kon las kashkas de sevoya i kon una kuchara de kafe. El guevo blanko se aze maroneyada i la savor de la sevoya entra un poko aryento.
El guevo de Pesah mos konta: komo una vida mueva se esta kreando aryento de su madre i aspera kuando va naser, kale ke venga el tyempo de naser. Esto semboliza salir de Misrayim. El Guevo es la vida. Komo salimos de Misrayim a una vida mueva, komo nasimos un puevlo muevo kon la Tora i del guevo sale una vida. Ansina despues de Pesah se korona kon Shavuot.
De las primeras kulturas, kreen ke, el guevo entero eksplika al Dyo Santo. Kuando se rompe se produse el umano. Tambien i el mundo parese a un guevo, aryento i afuera. La formasyon del universo es komo se rompyo el guevo para salir los mundos diferentes.
Afilu la primavera es komo un nasimyento muevo. Un empesijo muevo. En munchas kulturas se enkolgan los guevos boyadeados enriva de los arvoles komo sembolizan al empesijo muevo. Porke los arvoles syemre se renovan de muevo komo la vida.
La recheta de lo guevos haminados de Pesah, ke los Izmirlis dizen guevos roshos.
Guevos ke karar keresh
Kashkaras de sevoyas
Pimyenta
Sal
Un poko de azete
Papel de ambalaj amariyo se metiya para ke de la kolor a la agua, agora no egziste muncho.
