Albert Contante
El Alhad, 3 de Marso iva aver un Bat Mitzvá. Deviamos de ir kon oto el viernes a Virginia, ande iva tener lugar el Bat Mitzvá... Ma desidimos de anular el viaje para mozotros dos.
En lo ke pensava a Bat Mitzvá, me akodrí de una estoria verdadera, una estoria ke “El Dio ke me ayude!”. Avía un viejo i una vieja judios yamados Sr. i Sra. Israel. Bivían a sinko puntos de muestra kaza en Whitestone. Un día devían de ir a un Bat Mitzvá i era muy tadre para ir a la sinagoga. El Sr. Israel empesó a kondusir rapidamente. Mientres ke kondusía rapidamente, pasó por una luz kolorada. Guay! La Sra. Israel avrió su boka en boz alta, pataleando su braso en el aire i gritó: “Pasates una luz kolorada! Keres matarmos kon tu adjile?" En ke estava diziendo esto, pasó otra luz kolorada. Por siguro ke avía un polis en su oto ke lo vido pasar la luz kolorada i detuvo al Sr. Israel i le disho: “Save ke viene de pasar una luz kolorada? Tendré de darte un kastigo de $250.00 i puntos negativos en tu lisensia”. Kuando eskapó de dizir estas palavras, la Sra. Israel saltó kon su boz fuerte i disho: “Ofisier, Ofisier! Pasó dos vezes las luzes koloradas. Dale dos bilyetos, dale dos bilyetos!” El polis se aserkó de la ventana avierta del oto i disho: "KON UNA MUJER KOMO LA TUYA, NO TIENES MENESTER DE DINGUN KASTIGO". Se va sin darle punision.
Albert
Esta estoria era konosida entre todos muestros amigos de Whitestone. Después de un tiempo, un día Zelda i yo kondusíamos un fin de semana a Syracuse para ver la inaugurasión de una klinika. Kondusir al norte de New York me tomava 6 oras normalmente. En aserkándomos de Syracuse, kondusi 8 milas por ensima del limite indikado. Avía una oto de la polisía eskondido para aferrar a los konduktores ke pasavan el limite de velosidad. La verdad ke por 8 milas por ensima del limite de velosidad, dependiendo del tráfiko, munchos polises no arretan los otos, ma este polis parese ke se avía alevantado del otro lado de la kama i me detuvo. Normalmente, muchos polises no detienen a los konduktores de este tipo. Esta vez, vino, kitó el livriko de djezas i disho: "Estava akselerando", i yo respondí kon una boz kayente: "Ya save, ofisier, te kontaré una estoria real.” I le kontí toda la estoria del Sr. Israel. La oyó i en vista le saltó una grande riza i disho: "Me izites reír tanto ke lo nesesitava oy. Puedes ir libremente sin djeza.
Nunka va kontar esta estoria a dingún otro polis.
