Durante la Revolusion Franseza, Napoleon kito leyes para liberar a los judios. Los judios ivan a ser sivdadinos iguales a los otros fransezes. En el Imperio fransez i en los paizes ke Napoleon Bonaparte konkisto, introduzo otras ideas de libertad. Anulo viejas leyes ke restrinyavan a los judios de bivir en los getos i elimino la identifikasion forsada de los judios de apuntar la estreya de David a las vistimyentas.
En Malta, dio fin a la vendida de judios komo esklavos i permetio la konstruksion de una sinagoga aya. Tambien anulo las leyes ke limitavan los derechos de los judios a la propiedad, la orasion i siertas okupasiones. Esperando una viktoria en la Tierra Santa ke no se realizo, eskrivio una deklarasion publikada en avril del anyo 1799 para una patria judia aya.
Para provokar la entegrasion judia a la sosiedad franseza, Napoleon tambien apliko varias politikas ke impedieron la separasion judia.
Limitó la praktika de los judios de emprestar moneda, en el Dekreto sovre judios i usura (1806), limitó las rejiones ande los judios eran permetidos de emigrar i ovligo a los judios de adaptar nombres formales. Tambien, ovligo el governo fransez a regular la vida relijioza judia.
Los istorianos no estan de akordo sovre las intisiones de Napoleon en estas aksiones, i sovre sus sentimientos personales i politikos sovre la komunidad judia. Unos estan diziendo ke tenia razones politikas ma ke no sintia simpatia por los judios.
Los lideres de las monarshias de otros paizes se opozaron a sus aksiones. Despues ke fue vensido de parte de la Koalision kontra Fransia, una kontrarevolusion se ekstendio de la parte de munchos de estos paizes i re-establisio prekosiones diskriminatorias kontra los judios.
Napoleon era un katoliko romano pratikante. No se puede dizir ke era un kristiano muy relijiozo. Sin ambargo, reprezanto la Evropa kristiana tal komo estava trokando, i las ideas de la ilustrasion modifikaron el komportamiento de la Evropa kristiana.
Por un lado, avia eredado todos los viejos prejudisios kontra los judios. Por otro lado, el muevo espirito de Evropa lo estava motivando: darles a los judios igualdad de derechos, asegurar por ke los enteresos de los judios se protejen i ke los judios se entegren a la sosiedad. Napoleon permitio ke los judios seygan sivdadinos i ke sirvan en la armada.
La igualdad de derechos tuvo un alto kosto. Tomo parte direkta en los asuntos judios. Fue el primero de una seria de lideres evropeos ke interferaron a la vida judia para trokarla a sus gusto.
Napoleon deklaro aviertamente ke keria ke los judios se asimilaran i tuvo aliados en el puevlo judio. El movimiento reformisto estuvo de akuerdo kon el, para ke el problem del puevlo judio se rezolva.
Napoleon establesio un sistema de konsistorios (konsultos judios) ke eran responsavles direktamente a el. Fue a traverso de eyos ke la vida judia iva ser governada, modelada i formada. Estava esperando ke le ivan ayudar a dirijir los judios a konvertirsen kompletamente a fransezes en la jenerasion vinidera. De esta manera, el problem judio iva dispareser. Estava kreendo ke la relijion judia, komo se aviya pratikada a lo largo de los siglos, iva trokar por entero.
