Antes munchos anyos un diya de Viernes, una mujer judiya se alevanto demanyanika, troko las kamas, gizo las komidas para Shabat, alimpyo la kazika, gizo las borekitas, metyo la meza de Shabat, i ya se kanso la poveretika. Se entro al banyo, se lavo, se almisklo. Despues alimpyo el banyo, alevanto los legenes, espondjo en basho, se metyo el burnuz i se asento ensima del sedir del salon, kansada bolada. Ensima de la meza de Shabat aviya el pan Hala, unos dos mezelikes, komo tarama, lakerda, salata de meoyo, todo tapado para ke no vengan las moshkas. Aya ke estava la mujer repozandose ke le vino un esfuenyiko dulse, ke ve? Entro un gato por la ventana i se esta aserkando de la meza. Eya empeso a arondjar el gato en dizyendo “Pist! Pist!”. El gato entiende de Pist? Vino serka de la meza i salto ensima la siya i de aya a la meza. La mujer dainda esta gritando “Pist, piiiiiissst!”. El gato ke topo trezoro ensima la meza, ampeso a regalarse, empesando de la tarama, despues de la lakerda i por savor de boka el meoyo. A la fin ampeso la mujer a gritar “PIST KE TE VEYA KANYO, K’ESTO DE BANYO”. Yani kijo dizir esto de banyo, kansada i entontesida, si no ya se lo ke te va azer yo!.
A la noche vino su marido, el ke ve? La tarama aremishkada, el garato manko, el meoyo ensima el mantel, el pan Hala aremishkado. Le demando a su mujer: Kualo es este hal de meza de noche de Shabat? La mujer le respondyo ke era el gato ke vino i izo esto todo. Deke no lo arondjates? Aviya salido del banyo i m’estava repozandome.
No se komo eskapo este diya, ma sigun mi, esta mujer no era muy biva ni entelijente.
