Antes 40 anyos (1984), kuando entri al klub DOSTLUK, aviya una tradisyon muy ermoza: kada Purim, Sukot i Simhat Tora ir al azil i alegrar a los pansyoneres. Kon tyempo se fondo el Barınyurt, (oy, OR-YOM), de sorte, kada anyo, las dammas voluntaryas del Dostluk, aparejavamos teatrikos kon kantes i bayles i mos ivamos kon grande plazer.
No vos puedesh imajinar ke karar tomavamos plazer de alegrar a los aedados i tomar sus bendisyones. Esto duro fin ke se serraron los klubes ma mozos, el grupo de teatro de vez en kuando ivamos i aziyamos muestro dover siguro no tan ermozo komo antes.
Purim es el diya de salvasyon de los djudyos de Persya, es fyesta de alegriya. Las dammas voluntaryas de OR-YOM i GOLDEN AGE, este Purim me dyeron la onor de azer este evento tradisyonel.
Pensi, yo sola kualo puedo azer? De vista lo bushki a mi amigo i partoner de teatro de 40 anyos, ke syempre viniya kon mozos a ayudarmos i nunka no diziya no, muestro kerido İZZET BANA. Le demandi si esta dispuesto en estas datas. Komo pensi ni esta vez disho no.
El 25 de marso lunes demanyana mos fuimos a OR-YOM.
Seya las voluntaryas seya los pansyoneres mos aresivyeron kon brasos avyertos. Komo ay muncho tyempo ke no me iva, malorozamente no vide pansyoneres ke konosiya de antes. Kualos muryeron kualos estavan byen aedados. Dospues de tomar el kafe kon eyos, enpesimos al program en kantando la kantika “PURIM PURIM PURIM LANU”, dospues, yo, en kontandoles anekdotes, İzzet kon su boz ermoza les kanto kantikas sefaradis, gregas i de muzika Turka. El diya termino komyendo todos endjuntos una ermoza komida de midi.
El 27 marso miyerkoles, kon el mezmo program mos fuimos a la keila Ets-Ahayim en Ortakoy. Felisitasyones a las dammas ke lavoran en el GOLDEN AGE, tomaron kaji 150 personas de sus kazas i las trusheron. Dospues de komer un ermozo doner (siguro kasher) tomimos shena kon İzzet i terminimos muestra misyon.
Yo kero rengrasyar a todos los ke me dyeron esta misyon i me izyeron akodrar los diyas pasados. Porke ay kaji kuatro anyos, emprimero la pandemiya, dospues el rash de Hatay i agora la gerra, ke no pudimos azer nada. En terminando va repetar el slogan de las voluntaryas de GOLDEN AGE: “ESTAMOS OROZOS EN AZYENDO OROZOS”.
