Komo un ayre asoplo i se eskapo, mos kedo solo la alegriya. Por la fiesta de Purim esto avlando. Este moed es livyano; no es pezgado komo Pesah.Vyene i se va, mos desha la alegriya. Purim es para mi mavlachas, orejas de aman, folar de Purim i dulse de kashkarikas de portokal; aaa pardon muncho me olvidi el masapan. En djusto, komo karota, komo banana, komo diferentes frutas. Kolores, kolores.
Antes lo aziyamos komo fiesta, en kada kaza kon los paryentes, kuando era chiko, ma agora no kedo nada. Aviya munchas patiserias ke vendiyan mavlachas, en las vitrinas metiyan shaday, chuflete, tijera, sepetikos aryento yeno de masapan. Esto todo kedo en las ojas de la estorya. La emportansa de Purim es ke mos apareja i mos da haber ke ya esta vinyendo Pesah. Por esto dizimos, Purim Purim lanu, Pesah en la mano.
I agora empesa a aparejar para Pesah, de agora ya empesan las keridas mujeres al empleyo. Primera koza es prasa, para azer albondigas de prasa, i pastelikos de prasa. Albondigas de prasa es komo una djoya de la kozina Sefaradi.
Espinaka siguro, para azer enchusa, mos plaze muncho i tambien bezelya, munda babam munda. Matsa es la primera koza, si no komo vamos a komer bumuelos, i tambien para azer supa de sodra. El tishpishti de Pesah, sharope blanko, i masapan si no ay no se dize ya vino Pesah... Absolutamente ke la primera koza de Pesah es la Agada porke la estorya toda esta aya, los grandes van a meldar, i kon los ritueles, i mozos vamos a sintir komo paso kuarenta anyos. I dospues senaran en la meza, i ke empese a vinir las fritadas, los pishkados, dospues los dulses porke i eyos komyeron en el viyaje de kuarenta anyos albondigas, fritadas i pishkado frito, i izyeron tishpishti!
Keridos asperamos ke estas fiestas vengan kada anyo i ke mos topen kon sanedad, i djustos... En diyas buenos mos toparemos.
Purim vyene kon su alegriya, Pesah vyene kon su parnasa yena.
