La semana ke viene tenemos una semana de vakansas. Los amigos se estan indo a lugares serkas komo Alexandropolis o Thesaloniki. Unos kuantos amigos se estan indo a İzmir, Eskishehir, o Kazdağları. Porke dainda no vino la sezon de entrar a la mar. Por esto se estan indo a lugares serka para azer vakansas de kultura. Unos kuantos amigos kon ken estamos pasando las vakansas en Estanbol me disheron, ayde Cako azemos una program de una semana para no kedarmos komo sirsiri mayin. Ize una lista ermoza ke vos esto eskriviyendo i a vozos, puede ser ke estash i vozotros en Estanbol; puedesh azer algunas kozas del program ke ize yo. Miri a la temperatura, el tiempo kayente. Se puede ir a la ada, Prinkipo un diya demanyana tomar pogachas de berendjenas i un poko borek ke tiene krema ariyento i en el bodre de la mar komerlos kon chay. Despues del dezayuno azer un torniko en el charshi, i kaminar un tur nostaljiko en la ada. Otro diya se puede ir a piknik; si keresh azer barbeku porke el aver estara disheron maraviyozo. Un diya puedesh apartar por el Bosfor. Si keresh por el lado de Asia o sino por el lado de Evropa. En el lado de Asia puedesh ir a Chamlica, a Kuzguncuk, komer un yogurt en Kanlica i si keresh komer pishkado en el Anadolu Kavagı. Otrun diya puedesh ir por el lado de Evropa. Azer dezayuno en Rumeli hisar, kaminar un poko por el lado de la mar komo Bebek o si no Büyükdere al lado de las barkas ke son muy shik. Para azer un poko de nostaljiya, puedesh ir a Sarıyer para komer Borek o si no al muhallebici ke se save muy bien. Tambyen por el lado de Asia ay la Marina ke se yama Kalamısh Marina i en kaminando puedesh vinir al parko de Fenerbahçe. Aki puedesh kaminar kon la vista de las islas i oyer las bozes de los pasharikos ke kantan la demanyana. Si sale el dia un poko ennuvlado puedesh ir a los muzeos komo Topkapı, Ayasofya, Beylerbeyi Sarayı o Dolmabahçe Sarayı. Si no vos fuitesh fin agora al muzeo Arkeolojiko, es muy enteresante; kale absolutamente ir i kaminar este muzeo. Muy serka es el sarnich ke se yama Yerebatan; de aki puedesh ir aya. Tambien el Sarnich ke se yama Binbirdirek es koza de ver. En eskrivyendo, me vino al tino de birden si vos fuitesh al muzeo ke se yama Panorama 1453, ke es una koza de ver. De aki se puede vinir a “Türk dünyası kültür mahallesi”. Aki puedesh ver la kultura de los estados Turkos de todo el mundo. Komo disheron si salyo el aver ermozo se puede ir a Salı pazarı ke se avyo muevo en Galata Port. Mas de esto, si keresh azer un poko de nostaljiya puedesh ir a los sentros ande bivitesh antes 50 anyos, komo Balat, Kula, Ortakoy o en los kazales ande meldatesh komo Kurtuluş, Ferikoy i Sishli. Yo me fui a estos lugares i me emosyoni muncho. Me esta paresyendo ke si azesh este program ke vos eskrivi vos va pasar las vakansas yenas i ermozas.
