Komo esto eskrivyendo este artikolo el ultimo dia de Marso, va tratar de un evento relatado a este mez: vos va prezentar una kurta biografiya de Uriah P. Levy, el primer komodoro (un titolo naval ensima del kaptan i debasho del amiral, jeneralmente otorgado temporalmente a un ofisyal komandante de un eskadron o division de una flota) Djudio de los Estados Unidos.
Nasido en Filadelfia en 1792, Levy se konosyo kon la mar muy demprano (algunas fuentes informan ke teniya 10 anyos i ke torno a su kaza para su Bar Mitzvah, otros endikan ke teniya 14 anyos, en todo kavzo puedemos dizir ke era minor), kuando se enrolo komo micho. Levy entro a la armada marina kuando apenas teniya 20 anyos. Sus habilidades militares fueron imediatamente metidos al test kuando los Estados Unidos entro en la Gerra de 1812 kontra la Inglaterra. Si bien ke las primeras misyones de Levy fueron en la kosta atlantika, el fue nominado a la lista de ekipaje del U.S.S. Argus en 1813. Kuando el Argus kapturo el HMS Betty de la Gran Bretanya, Levy fue promotido al rango de ofisyer i dado el komandamyento de este valorozo barko. Malorozamente, en Agosto de 1813, los britanikos atakaron i rekuperaron el HMS Betty i Levy kedo pizonyero asta Disiembre de 1814.
No es sorprendente para la epoka ke la karyera de Levy a vezes fue amenazada por soldados i ofisyales a los kualos no les agradava i no lo keriyan muy bien porke era Dudio. Ademas, Levy konfronto animosidad devido a su avyerta opinion kontra la flajelasyon (kırbachladear). El se konsidera komo el padre del proyekto de ley kontra la flajelasyon ke se aprovo i entro en vigor en 1850. En 1857, Levy fue "redusido de rango" djuntos kon otros 48 ofisyaeles, ma despues de apelar su inosensya, su rango fue reintegrado. Poko despues se le dyo el komandamyento de la flota del Mediterraneo.
Fuera de la marina, Levy realizo munchos investimyentos imobilyares reushidos en Nueva York i era konosido por aver merkado i restorado la historika propriedad de Thomas Jefferson en Monticello. Levy tambyen fue un filantropo ke se entereso spesyalmente en los eskopos Djudios.
Levy fue el primer prezidente de la Kongregasyon Ebrea de Washington i un myembro activo de la Kongregasyon Shearith Israel de Nueva York. Muryo el 26 de Marso de 1862.
Se prezentava syempre dizyendo : “yo so sudito de los Estados Unidos, marinero i Djudio".
