Adio a la memorya del Olokosto de la Muzika:
Amnon Weinstein
El era un grande artisto. Nasyo en 1939 en Tel-Aviv i kuando teniya syete anyos empeso a tomar lesones de violin. A 14 anyos empeso a la viyola i trompeta, i a 20 anyos a la gitara klasika.
El padre era fabrikante de violines. Antes la gerra se aviya fuyido a la Palestina. Amnon aviya tomado las lesones en la atelye de su padre i kuando el padre se muryo kontinuo en el atelye.
El lavoro kon munchas orkestras, izo violines i los reparo. Amnon Weinstein aviya kontado, eksplikando ke los kuatro violines ke eran los testigos silensyozos del jenosidyo, durante toda la gerra, fueron el testigo de la opresyon i la violensya ke aplikaron a los djudyos ke estavan en los getos i en los kampos komo prizonyeros. Los violines fueron el testigo de las trajediyas inumanas.
A lo ke estan kontando, en Auschwitz aviya dos orkestras; la una era kompozada solo de ombres.
Kada demanyana, antes del amaneser, los djudyos deviyan de lavorar komo esklavos i kuando los yevavan a las kamaretas de gaz empesavan a tanyer los violines.
En las istoryas de Weinstein, el viaje de los violines desde Evropa, Amerika, asta la tyerra prometida fue reelmente impresyonante.
El violin yena de dinamita: “Motale” i la istorya de su violin, era una de las mas efektivas.
“En las sharas de Belarus biviyan un grupo de partizanes djudyos i kristyanos. Un dia los partizanes, enkontran un ijiko abandonado ke se estava fuyendo de los almanes. El estava durmyendo kon su violin allado.
Kuando vyeron ke Motale estava djugando kon su violin, kon muncha abilidad i maestriya, pensaron i desidaron de uzar este talento kontra los nazis. Los partizanes izyeron un plan i Motale para demandar sedaka empeso a tanyer el violin en la kaye prinsipal de la sivdad.
Empeso i a tanyer las kantikas Almanas, en el lokal de los nazis. Motale se benefisya del entorno de la konfiensya kreada. Yeva al lokal las dinamitas ke guadrava en su violin.
Kuando tuvo las dinamitas sufizientes ke los aviya guadrado entre las paredes i a la entrada de la puerta, una noche ke aviya munchos almanes, izo eksplozar las dinamitas i reusho a fuyirse. Reusho a matar mas de 200 soldados almanes.
Kuando tuvo 12 anyos, se muryo en un kombate.
El artisto de violin “Cihat Aşkın” lo deskrivyo kon estas palavras.
“Amnon Weinstein” izo muy grandes kontribusyones a la umanidad, asi ke al mundo de la muzika. El fue el ponte para la umanidad kon su arte. Los violines ke tokava kon sus manos majikas, avlavan komo si estuvyeron avlando.
Amnon no solo toko a los instrumentos, el toko tambyen i a las personas. Su dedikasyon i pasion inspiraron a munchas personas. Amnon no era solamente un produktor de enstrumentos, fue tambyen un visyonaryo i un lider. Era un ombre de korason riko. Teniya un orizonte muy ancho, una vizyon rika i un korason manyifiko ke puediya ver el futuro.
Izyeron un filmo dokumental al nombre de Amnon.
En este dokumental ekspresaron una fraza ke kero partajar kon vozotros keridos lektores.
“Kada konsyerto es una parantez majika, un sentimyento en el, ke el dolyo i la meditasyon se mesklan, ma tambyen es un inkreivle salvador de enerjiya, el poder de la muzika i kontra la barbariya, es la sansasyon de tornar a ganar.”
Fue un grande maestro ke refletava kon sus ojos el pasado i el futuro al mizmo tyempo.
Sus ovras i su erensya van a inspirar las jenerasyones futuras i van a avrir el kamino a los ke van a suivarlo.
