El 31 de Marso bivimos en muestra sivdad i en muestro payiz las eleksyones munisipales ande elijimos el mayor de muestra sivdad d’Estanbol, i el mayor de muestro distrikto (Şişli para mi). Ay mas de vente anyos ke la opozision no reusho a ganar eleksyones aparte de las eleksyones munisipales del anyo 2019. En 2019, la opozisyon reusho a ganar las 14 metropoles las mas emportantes de muestro payiz. En Ankara i en Estanbol dos personalidades muy emportantes, los sinyores Mansur Yavaş i Ekrem İmamoğlu fueron elijidos i tomaron un rolo muy emportante en la vida politika de la Turkiya. Mizmo los kijeron elijir komo prezidente de la Republika. Ma esto todo no fue muy emportante i noche de alhad mirando la television vimos ke el partido de la oposision reelmente reusho i gano 12 o 15 muevas metropoles i sivdades sin pedrer dinguna prezidensia.
Estas eleksyones reelmente mos dyo koraje para ke veamos ke la demokrasia egziste dainda en muestro payiz. El prezidente del partido, avlando la mizma noche en la television mos rogo de no azer movimyentos egzajerados, komo lo ke izyeron anyos enteros. Kualo va ser dospues de esta nochada? El partido del poder se va pensar lo ke puede azer vente anyos dospues. Las reformas ekonomikas ke va pueder realizar. I no savemos si reelmente van a pueder reushir. El mayor d’Estanbol, el sinyor İmamoğlu lavora kon un ekipo bastante ancho formado de personas enstruidos i savidos. Son eyos ke realizaron buen karar de trokamyentos i restorasiones en los edifisios istorikos. Oy en Estanbol, puedemos topar buen karar de edifisios ke se pueden vijitar. Tenemos buen karar de muzeos ke puedemos vijitar tambien.
Lo ke konti puedeser no es el dover primordial de la munisipalidad. Ma me topi pronto en diferentes prezentasiones de la munisipalidad d’Estanbol i de los mayores de diferentes distriktos. Ya se ke tyenen munchos proyektos para ayudar la djente a enforteser sus edifisios. Tyenen planos para ke bivamos en una sivdad mas vedre, ande la djente va pueder respirar mas fasilmente. Pensan ayudar los estudiantes ke frekuentan las universidades. Pensan ayudar los mansevos para ke topen azilo para kedarsen en esta sivdad.
Esto va ser el primer paso para tener una administrasion mas demokratika.
