Rav Kopel se ganava la vida merkando variles de vodka i bira i vendia sus produktos a las tavernas de Likova i sus alrededores. No era una vida fasil, kon los fuertes impuestos aplikados por el governo espesyalmente a los judios en la Evropa del diziochen siglo.
Kada anyo, un diya antes de Pesah, Rav Kopel vendia su hamets a uno de sus vizinos no judio. En lugar de kemar el hamets, los rabinos aviyan metido la praktika de vender el hamets a un no judio. Los vizinos de Rav Kopel estavan auzados a este ritual anual. El komersante de likores judio afirmava un kontrato kon uno de eyos, diziendo ke el vendio todo el kontenido a una soma igual a su valor real. Duspues de Pesah, Rav Kopel merkava atras lo ke le aviya vendido.
Un anyo, a uno en Likova le okuro una idea mueva: si todos refuzavan de merkar la vodka del judio? En este kavzo, Rav Kopel se los iva dar todo debaldes. Deke merkarlos si los puediyan tomarlos debaldes?
Kuando Rav Kopel sono la puerta de un vizino un diya antes de Pesah, el vizino refuzo de merkarlos. Rav Kopel aprovo un otro vizino. Kuando tomo la mezma repuesta, Rav Kopel entendio lo ke se estava pasando.
No teniya tiempo de ir a otros merkaderes ke biviyan mas leshos. Rav Kopel no penso ni un minuto. Presto, kargo los variles de hamets a su kamyon i se dirijo asta el rio. Entremientes, sus vizinos lo estavan obzervando de leshos kon alegriya. A boz alta, Rav Kopel anonso: "Todos los ke keren, pueden tomar estos variles !’’
Duspues torno a kaza para aparejarse para el festival. Akeya noche, Rav Kopel se asento al Seder kon el korason alegre i resito la Agada: "Deke komemos este pan sin levadura? Porke la masa de muestros padres no tuvo tiempo de fermentarse’’. Estuvo meldando en sintiendo la savor de kada palavra en su boka. Todo su kapital lo aviya invertido en akeyos variles de vodka i bira; i grande parte de la soma la aviya merkado kon kredito. Agora estava sin un grosh i teniya de pagar grandes devdas. Ma su korason estava tan livyano i briyante komo un pasharo.
No teniya ni una gota de hamets en su poder! Por la primera vez en su vida, tuvo la oportunidad de demostrar verdaderamente su amor i su fidelidad al Dio. Aviya eliminado toda la levadura de su posesion, komo el Dio le aviya ordonado.
Kuando Pesah se eskapo, Kopel se dirijo a su mahsen para azer un plano komo pagar sus devdas i empesar de muevo su negosio. En la puerta, enkontro sus vizinos merkaderes. "Oye, Kopel!" grito uno de eyos: "Deke dishites ke puediyamos tomar los variles de votka si teniyas la entision de meter estos perros gardianes aya para protejar los variles?"
Kopel, kon enkantamiento, se dirijo al rio. Ke ve? Una trupa de perros feroses anturavan los variles, i no permetian ke dingunos se aserken.
Kopel arasto los variles fin al rio. Uno a uno, vazyo todas las votkas i las biras al rio.
Ken siempre es onesto, tiene el korason trankilo. La verdad, a la fin, viene i lo enkontra.
