La ermana de mi mama biviya en Paris. Su marido era nasido en Estambol i engrandesido en Paris. De sorte ke teniya munchos amigos fransezes. Uno de estos era Philippe. Este Philippe era muy kapachi persona. Le kuadrava mil i unas kozas para ganar paras. Ansina se aviya echo muy riko. Ma kuando ampeso la sigunda gerra mundial, se tuvo de fuyir de Paris porke los almanes aviyan okupado Paris. I el, komo todos los otros judios, estava en perikolo de deportarse, por esto se fuyo al sud de Fransya. Se guadro en un kazaliko chiko, aryentro las montanyas, en la frontiera de la Espanya. Para pueder mantenerse en vezes se iva a la Espanya, ansina se izo i amigos espanyoles.
Eee la gerra estava kontinuando kaliya mantenerse, kaliya lavorar. Ma en este kazaliko muy chiko no aviya dingun ofisyo. Kon uno de los amigos espanyoles pensaron i desidaron de azer kontrabanda i merkado negro. Por modo de la gerra, en la Fransia no se estava topando munchas kozas. Bushkaron i demandaron i toparon ke no se esta topando kablos ni teles de elektrik o de telefon. En Espanya aviya todo. I komo van a trayer estos teles a la Fransia? Kale pasar por la frontiera i era defendido. Izieron un plano. El amigo espanyol ato un tel a un tel ke ya egzistiya. I Philippe, travava este tel por la parte de Fransya. Ansina sin ke se apersivan los de la frontiera, pasavan los teles. Los teles estavan detenidos komo savemos ensima de unos palos altos. I Philippe i su amigo espanyol ganaron munchas paras i se izieron muy rikos. Philippe estava vendiendo estos teles por merkado negro.
Ma keridos amigos esto malorozamente no kontinuo. I se aferraron. Philippe en Fransya i su amigo en Espanya, los metyeron en la prezyon.
Demandame komo los aferraron? No vos puedesh imajinar. Los polises de la frontiera estavan asentadikos en la guerta bevyendo sus kafikos ke ensupito vieron una koza ke no estava normal. Kualo era? Ensima de estos teles ke estava travando Philippe por la parte de Fransya se asentaron pasharikos. I sin meneyarsen estavan avansando. De la Espanya a la Fransya. No estavan ni bolando ni meneyando. Esto no estava normal. Se metyeron a suivar. I toparon esta kontrabanda. Pishin se metyeron en kontakto kon la polisiya de la otra parte de la frontiera i en mizmo momento los aferraron a todos los dos.
Al amigo espanyol lo metyeron en prezo ma a Philippe lo metyeron a un kampo de los fransezes kon entisyon de mandarlo kon treno al kampo de konsentrasyon. Tuvo una shans ke esta aventura paso el tiempo ke ya estavan para peryer la gerra los alemanes. Eskapo la gerra i los desharon libre del kampo ande estava detenido.
