Noche de Alhad estavamos en un restoran kon syertos amigos. I todos tenemos en el telefon mobil un link formado por los Turkanos ke biven en Israel i ke emplean dainda el turko; ke mos enforman de lo ke se esta pasando dospues del 7 Oktobre en Israel i en las tyerras del dorredor del payiz. I el muevo haber era ke los Iranianos dospues ke Israel echo bombas a la embashada iraniana en Damascus i mato syertos jenerales de la armada Iraniana dyeron karar de atakar Israel. Es djusto ke los Amerikanos estan dando apoyo a los Israelyanos i tyenen dos o tres naves militares en la mar Mediteranea. Reelmente todos estan djugando kon el fuego i no estan pensando lo ke puede afitar a la fin. Ya savemos ke los Israelyanos tyenen “Kupolas de fierro”; i estos instrumentos tyenen la kapachetad de detener los “instrumentos de ayre sin persona”. Ya se ke no es de uzansia de eskrivir este modo de artikolos kon munchos terminos teknikos en judeo-espanyol. Los Amerikanos dizen ke Iran enbiyo de Iran asta Israel de 400 a 500 de iasp (instrumento de ayre sin persona). I ya mos ambezimos ke un fuze balistik (balistik kere dizir ke tyene una arma nuklear, kon materyal kimiko o biyolojiko) puede vinir en 12 puntos de Iran asta Israel, i los fuzes normal en 2 oras, i si avlamos de los iasp en 9 oras. La armada Israelyana reusho ke dingun fuze venga a las tierras israelyanas. Todos fueron deteninos por las kupolas de fierro.
Reelmente es un orgolyo la reushitad de los Israelyanos. Ma kreo ke los ombres de politika no estan valorizando ke los payizes ke no eran kapaches de munchas aksyones oy en diya estan realizando todo modo de teknikas i aksyones. Ken puediya pensar mizmo sinko anyos antes ke los Iranianos puediyan embiyar syenes de fuzes en unos kuantos puntos de Iran asta Israel. Ayer la noche dospues de saver ke syenes i syenes de fuzes estavan en los syelos verso Israel, la mas grande partida de los Djudios del mundo estavan en merekiya por lo ke puede afitar.
Esto pensando ke los diridjentes del Iran saviyan lo ke devia de afitar. Ma devian de azer esta aktivitad muy kritika porke devian de mostrar reaksyon kontra lo ke Israel izo en Damascus. I izyeron una deklarasion asemejante. Oguro ke Israel no va atakar una otra vez los Iranianos. No esto de esta idea porke los Amerikanos pensan de esta manera. Penso de esta manera porke no kero ver una desgrasia en el Medio Oriente. Espero ver la PAS en estas tyerras.
