La perasha de Metsora nos enbeza lo bueno ke trae a la persona la avla buena; de entremeterse la persona kon palavras de ley i mitsvot, la persona tyene paga buena del Kriyador. Ma la kontra, si se auzo la persona avlar lashon ara, palavras non buenas, i de raportar palavras ke va traer danyo a su serkano, a su amigo, la pena es muy fuerte.
El verseto dize la vida i la muerte esta dekolgado en la alguenga. Si empleya la persona su avla para bueno alarga su vida, si no malorozamente aze danyo a su vida i a su salud. Sontrae a si mezmo angustya, i el biervo Tsaraat (Lepra), ke es el nombre de la perasha Metsora. Lo eksplikan nuestros savyos, “Motsi shem ra - el ke kito fama mala”. Kere dizir el ke kita fama mala por su serkano se apena kon la yaga de Lepra - Metsora. El ke avla lashon ara, kere dizir mal por su haver, kavza danyo asi mizmo ke se apena, porke avlo mal.
Dizen nuestros savyos, kon la espada se puede dar fin a la vida de la persona ke esta serka de su inimigo, ma kon la aluenga puede matar; kere dizir puede danyar a alguna persona malgrado ke esta leshos de el. Lashon ara, avlar mal entra en un grupo de pekados fuertes komo "avoda zara", sirvir idolos, i verter sangre. Miryam, la ermana de Moshe Rabenu se apeno kon yagas de lepra solo porke avlo por Moshe Rabenu, ke se separo de su mujer despues ke devino profeta. De este kavzo puedemos entender ke karar de grande es la pena de este defekto.
La persona kuando se milizinava de la lepra yevava a el santuvaryo onde el Koen dos palombikas por azerlas korban. Este akto enbezava a akeya persona ke mas no va chuchulear komo los pasharikos i va guadrar a su aluenga de avlar mal.
Komo lo rogamos del Shem Yitbarah en la orasyon de la Amida tres vezes al diya, “Mi Dyo! Guadra a mi aluenga de avlar mal, i a mis lavyos de avlar mintiras”.
Komo meldamos en el livro Teilim ke dize David Ameleh: “Ken es el varon ke envelunta vidas, estima a su vida i kere ver bueno, ke guadre a su aluenga de mal, i a sus lavyos de avlar mintiras. Tirate de lo negro, aze syempre lo bueno, bushka la pas i presigela”.
