Me akodro de la kantiga ke kantavan en kaza kuando era chiko.
“Purim Purim Purim lanu, Pesah en la mano.”
Esto era el sinyal ke estava vinyendo la fiesta de Pesah. I empesavan a prepararsen para Pesah ke era muy difisil. Bendicho el D.o, en mi kaza siempre estavamos arientro de la tradision. Kuando vinia Pesah mos asentavamos a la meza de el Seder. Komo yo era chiko solo estava mirando ma despues empesi i yo a partisipar al Seder.
En el Seder me akodro de los kuatro ijos de la meza. El savyo, el malonesto, el kayado i el ke no save demandar. Antes me vinia muy kuryozo. En la meza de fiesta ke echo tienen estos ijos. Ma en pasando tiempo i meldando la Ley santa avagar avagar se entiendo lo ke esta pasando.
Entre estos ijos, el kavo, el ke no save demandar es muy enteresante. Los savyos dizen ke estos kuatro ijos son kuatro jenerasyones de nuestro tiempo. Kada jenerasyon se alesho mas de la Ley santa i la tradision. Kuando el ijo el savyo puede demandar demandas de la alaha, el ijo malonesto perkura de alesharse de la tradision. El kayado no entiende muncho i solo demanda “kualo es esto”. Todos estos tres ijos o jenerasyones tienen koza para demandar. Ma la kava jenerasyon no save kualo demandar. Por esto la Agada le dize a la mujer de la kaza “at ptah lo – tu avre a el la puerta para demandar.”
Las mujeres de kaza, las madres bendichas de la kaza Judia son una forteresa para guadrar la tradision i la Ley santa. Por esto la Agada le da a la mujer una okazion para salvar al Judaismo del futuro.
Rogamos ke la meza del Seder este yena de demandas para konoser la Ley santa i las tradisiones del Judaismo.
Rogo kon todo mi korason de tener una Paskua alegre, enveranada buena i ayegaremos a munchas fiestas kon salud, kon repozo, kon ganansya, kon pas en nuestras kazas i en la tierra santa de Israel, amen.
Hag Kasher vesameah!
