Las fiestas de anyos antes, eran muy diferentes de las de oy. Los judios de Estanbol, todos moravan en las mezmas partes de la sivdad. De sorte ke, akeyos dias, se sintiya la emosion i la alegriya de las fiestas en estos lugares. Mezmo los vendedores ya empesavan a aparejarsen por la fiesta judiya. Komo todos biviyan endjuntos, kaliya ke todos azyeran los rituales de las fiestas, sino los otros lo remarkavan.
Los aparejos de Pesah eran muy pezgados akeyos diyas. Alimpiar la kaza, lavar los perdes, los tapones, los manteles, i duspues repasarlos o kolaladeyarlos, i meterlos al lugar. La kuzina se vazyava entera, los almaryos se alimpyavan, no kaliya ke kedara ni una miga de pan en dingun lugar.
Kuando la limpyeza eskapava, empesavan los ampletes i los gizados. El dulse blanko, el masapan, los gatós de Pesah, los guevos haminados, los burmuelos de matsa, las fritadas de espinaka, las albondigas de prasa, las dolmas de tomat, de pipirushka, i de kalavasa, los rulos de berendjena, el kodrero, las patatas al orno. Esto tomava buen karar de tiempo, i kuando Pesah viniya, las mujeres ya estavan boladas.
La primera noche de Pesah, todos los paryentes se arekojiyan en una kaza. Kuando los ombres tornavan de la Sinagoga, todos se asentavan al entorno de la meza, i empesavan a dizir la Agada. ‘Se lavaran las manos’, kada dos punto era lavar las manos. ‘Dan, sefardea, kinim, arov’ – ‘Ijikos no miresh por aya!’. I mozotros los ijikos miravamos kon kuriozita del kenar del ojo, kualo estan echando del djarro ariento la kaldera.
En muestra chikes, ya konosiyamos la sinyifikasyon de Pesah, ke es la salidura de Misraim, la endependensya de muestro puevlo. Kada anyo, selebramos este evenimiento ke paso miles de anyos antes. Komo meldamos en la Agada, en kada jenerasion, kada judio es ovligado de repetar lo mezmo, komo si ke el fue el ke salyo de Misraim.
Kada anyo, komemos el pan ke no tuvo el tiempo de levdar, el haroset, las yervas amargas untandolas al vinagre, por akodrarmos la amargura de muestros ansestros. Allado del Korban Pesah, metemos un guevo kocho ke semboliza la fekondidad, i la esperansa. Los kuatro vazos de vino sembolizan la libertad. Komemos la matza, la lechuga, kontando a las kreaturas las maraviyas ke izo el Dio, para kitarmos de Misraim. I en komiendo las komidas savrozas, mos sintimos ke somos un ‘Senyor’, i no un ‘Esklavo’.
Anyos antes, duspues de la orasion, kantavamos todos endjuntos, kon grande alegriya las kantikas de Pesah: ‘El Kavretiko’, i ‘Kualo es el Uno’.
Oy, estamos kontinuando a fiestar Pesah i a azer los rituales de Pesah para transferar muestra erensya a muestros ijos, i a muestros inyetos, ma seguro kon mas muncha livyanes, i kon la ayuda de la teknolojiya.
Pesah alegre al mundo judio!
