Lunes la noche realizimos el primer seder de este anyo. Pesah es la fiesta ande las mujeres lavoran muncho para el pranso del seder. Este anyo bivimos un problem para merkar matsa i arina de Pesah. La mas grande partida de los supermarketes este anyo preferaron de no vender matsa; kreo para no karishearsen en un sujeto kon los Djudios. Son los evenimyentos ke se realizaron dospues del 7 de Oktobre ke fue la razon. Ay 20 anyos ke emportamos las matsas de Israel. Puedeser ke no kijeron vender porke eran “made in Israel”. Los dirijentes de la Komunidad me disheron ke avian pensado esto, i trataron kon dos firmas en la Ingletierra i el presyo era serka el dopyo. No merkaron. Mizmo kon el presyo barato de la matsa israelyana ya lo venden a 195 liras en el Denet i 215 liras afuera. Komo munchas personas se alishtrearon a los presyos de los panes ke se venden oy en diya de 30 liras asta 200 liras, no uvo munchas reaksyones kon los presyos. Komo en todo modo de ofisios los vendedores keren aogar la djente kon los presyos, una ekonomista Iris Cibre disho ke devemos de boykotar los kafes i los restoranes la fin de semana del 20 i 21 April. I kreo ke fue un boykot reushido. Muncha djente no frekuentaron los cafes i los restoranes los dos diyas de fin de semana.
Me bushkaron de Izmir demandandome si estamos organizando “Un Seder” para Pesah i ande? Me demandaron si estan achetando turistos? Me ambezi ke el Kal de Ortaköy esta organizando un Seder. I todos los ke se enteresan se pueden ir aya. Kon los evenimyentos del 7 Oktobre tuvimos problemes de dezreposo. Si no, kreo ke munchas personas ivan a preferar sederes de 100 personas en un kal o en una sinagoga al lugar de organizar en las kazas. Los ke organizan estos sederes son mas profesyonales i kreo ke es mas barato de tomar plasa en un seder asemejante al lugar d’invitar en una kaza.
Vos avli solo de la vendidad de matsa. Syertos amigos durante el Bayram Muzulmano se fueron a Gresia; i se fueron a Atina ande biven 2.500-3.000 judios. I vijitaron el “Habat House” ke tyene i un restoran kasher i un supermerket ande venden mizmo “kasher le Pesah”. Tyenen el privilejyo de ser miembro de la Union Evropea. I kon estas kondisyones es muy fasil todo modo de kozas “Made in Europe”. Lo merkan komo es en el mizmo payiz. En Turkiya tenemos un alay de permisiones para todo modo de komidas importadas de otros payizes.
En la onor de la fiesta de Pesah; todas las ovras de bienfezensia kontinuaron a embiyar kartas, regalos, masapanes, sharopes, haroset, dulses… Oguro una fiesta alegre a todos ke meldan, mizmo ke no meldan mis artikolos en el Şalom i en el Amaneser.
